Sunday, June 28, 2015

ජීවිතය සතුටින් ජයගමු.

3
http://www.pickthebrain.com/blog/5-things-remember-everything-seems-going-wrong/ යන ඉංග්‍රිසි ලිපියෙහි අනුවර්තනයකි මෙය (පදානුගත පරිවර්ථනයක් නොවේ). එම ලිපියෙහි වැඩි ප්‍රමාණයක් ඉතා වැදගත් නිවැරදි හා සිත්ගන්නා සුළු ආකාරයට ලියා තිබෙන බැවින්, එය සිංහල පාඨකයන්ටද සමීප කිරීමේ අදහසින් මෙම අනුවර්තනය කරන ලදි.



ජීවිතයේ සියල්ලම කනපිටට සිදුවෙනවා වගේ පෙනෙන විට මේ දේවල් 5 මතක තබා ගන්න


දුක හා සැප ජීවිතයට පොදු දෙයක්. ඕනෑම කෙනෙකුගේ ජීවිතයේ අවස්ථාවක් එන්න පුළුවන් සියළු බලාපොරොත්තු සුන් වෙලා යන. ඔබට ජීවිත‍ය අපායක් සේ දැනෙන්නට පුළුවන්. එහෙත්, මෙවැනි අමිහිරි තත්වයකින් ගොඩ ඒමට තිබෙන රහස නම් එම තාවකාලික අමිහිරි තත්වය ඔබේ මුළු ජීවිතයටම ඍණාත්මකව බලපාන්නට ඉඩ නොදීමයි. මෙවැනි අමාරු කාලයන් ජීවිතයට වටිනා පාඩම් එකතු කරනවා. ඔබට ගොඩක් දුක හිතේවි, නමුත් එය ඔබේ ලස්සන ජීවිතය අවුල්කර ගැනීමට හේතුවක් නොකර ගන්න. ඒ සඳහා ඔබ කළ යුතු කුඩා දේවල් කිහිපයක් තිබෙනවා. ‍එම දේවලින් ඔබේ අපහසුතා හා බලාපොරොත්තු විරහිත බව සහමුලින්ම අතුගා දමන්නට පුළුවන්.


1. ‍මේකත් අනෙක් දේවල් වගේම ඉබේම කාලයත් සමග අවසන් වේවි

"සෑම අඳුරු රැයකට පසුව සූර්යා නැවත උදේට පායනවා" කියා කියමනක් ඇත. මේ මොහොතේ ජීවිතය ඉතා අමාරු බව දැනෙන්නට පුළුවන්, නමුත් එම අමාරු කාලය සදාකාලිකව පවතින්නේ නැත. දේවල් නිතර වෙනස් වෙනවා. ඒක ලෝක ස්වභාවය. ඉතිං මේ අමාරු කාලයත් ඉක්මනින්ම හොඳ අතට පත් වෙනවා. නිතරම ඔබ ඔබටම සිහිකැඳවන්න "ඉක්මනින්ම මේ කාලය ඉවර වේවි; මීට පෙරත් අමාරු කාලවල් ආවා; ගියා; එලෙසම මෙකත් ඉක්මනින්ම ඉවර වේවි" කියලා. එය පවුලේ ප්‍රශ්නයක් වෙන්න පුලුවන්; රැකියාවට අදාල ප්‍රශ්නයක් වෙන්න පුලුවන්; ආදර සබඳතාව ගැන ප්‍රශ්නයක්‍ වෙන්න පුළුවන්; ප්‍රශ්නය කුමක් වුවත්, එය ඉක්මනින්ම අවසන් වෙලා සාමාන්‍ය තත්වයට පත් වෙනවා කියා ඔබ දන්නවා. සිතන්න මොහොතක්. අතීතයේ සමහර අමිහිරි ප්‍රශ්නයක් දිහා දැන් බැලුවහම ඔබට බොහෝ විට සිනහ යනවා ඇත අයියෝ මං කොච්චර මෝඩ විදියටද හැසිරුණේ කියා. එලෙසම ඔබ දැන් සිටින ප්‍රශ්නය ගැනත් එලෙසම සිතාවි තව ටික කාලයක් ගියාට පසුව. ප්‍රශ්නයකදී වටින්නේ ඉන් ජීවිතයට පාඩම් ඉගෙන ගැනීමයි.


2.  ‍ටික කාලෙකින් මේ කිසිම දෙයක් ප්‍රශ්නයක් නොවේ

ඔබ දැනට තිබෙන ප්‍රශ්නය ලෝකේ තිබෙන ලොකුම ප්‍රශ්නය ලෙස ඔබට දැනෙනවා ඇති. එහෙත් ඒ ප්‍රශ්නය තව ටික කාලෙකින් ඔබට එතරම් දැනෙන්නෙ නැහැ. ඔබේ ජීවිතේ මීට කලින් ප්‍රශ්න ඇති වූ විටත් ඔබට ඒ වෙලා‍වෙ දැනෙන්නට ඇත්තේ මේ ලෙසමයි. එහෙත් ඒවා දැන් ඔබට කොහෙත්ම ප්‍රශ්න නොවේ නේද? ඔබ ටික කාලෙකට පසුව මේ ප්‍රශ්නය ගැනත් සිතාවි මා එදා ලොකුවට සිතන් හිටියට එය මහා මෝඩ වැඩක් නේද කියා.  සමහර විට ඔබ දෙවියන්ට ස්තූති කරාවි ඔබට එම ප්‍රශ්නයෙන් එතෙර වෙන්නට ශක්තිය ලබා දුන්නා කියා. ප්‍රශ්නය කොතරම් ලොකුවට දැනුනත් ඔබ ඔබටම මතක් කර දෙන්න එය ඔබේ ජීවිතයේ එක් කුඩා අවස්ථාවක් දෙයක් පමණයි කියා. එම කුඩා අවස්ථාවට ඔබේ මුළු ජීවිතයට කඩා දැමීමට ඉඩ දෙනවාද?


නරක කාලයට නරක පුරුද්දක් තිබෙනවා. ඒ තමයි අපේ සිත පොඩි කර පාගා අඳුරු කිරීමට. ඒ නිසා ඔබට සිතෙනවා ඇති කිසිම බලාපොරෙත්තුවක් ජීවිතයේ දැන් නැහැ කියා. එහෙත් ඔබ ගැන විශ්වාස කරන්න. ඔබ මීට පෙරත් මෙවැනි අර්බුදවලට මුහුණ දී ඒවායෙන් ගොඩ වූවා නේද? සමහර විට ඒ කිසිදු ප්‍රශ්නයකට වඩා මේ ප්‍රශ්නය තරමක් ලොකුයි යැයි සිතෙන්නටත් ඔබට පුළුවන්. ඇත්තටම එසේ වන්නටත් පුළුවන්. එහෙත් විශ්වාස කරන්න ඔබ ‍අතීතයේදී කළාක් සේම මේ ප්‍රශ්නයෙනුත් ගොඩ එනවා. ඔබට බැහැයි කියා සිතෙන්නේ ඇත්තටම ඔබට හැකියාව නැති නිසා නොව, ප්‍රශ්නයක් ආ විට සිතට ස්වාභාවිකව දැනෙන්නේ එලෙසයි. සිතන්න ඔබ දැන් ඔබේ ජීවිතය නැවත අඳුරු බලවේගයෙන් ඉවත් කරගන්නට සැරසෙනවා කියා. ඔබට කැමැති අනාගතය ගොඩ නඟන්නට පියවර ගන්න.


3. වේදනාව යනු ඇත්තටම ඔබේ ජීවිත‍යට අත්‍යවශ්‍ය දෙයක්

ජීවිතය ලස්සන අවස්ථාවන්ගෙන් පිරුණු එකක්. ඒ ලස්සන අවස්ථාවන් අත්විඳින්නට නම් අමාරු කාලයන් තුළින් ඔබ යා යුතුයි වේදනාව කියන්නේ ඔබේ දියුණු‍වට අත්‍යවශ්‍ය දෙයක්. එමගින් ඔබට තව තවත් ශක්තිමත් කරනවා. මතකද ඔබ පළමු වරට බයිසිකලයක් පදින්නට පුරුදු වූ අවස්ථාව. ඔබ වැටෙන්නට ඇති. තුවාල වෙන්නට ඇති. එහෙත් ඔබ ඒ දුක් පීඩා සුළු කාලයක් විඳීමෙන් පසුව බයිසිකලය වැටෙන්නේ නැතිව පදින්නට පුරුදු වුණා නේද? එවැනි නොයෙකුත් අත්දැකීම් ඔබට තිබෙනවා. මතක් කර බලන්න. වේදනාව කියන්නේ අපිට ශක්තිමත් කරන, සතුට ලස්සන පෙන්වාදෙන තාවකාලික අපහසුතාවක් පමණයි. අතීතයේ සමහර වේදනාත්මක අත්දැකීම් ලැබීම ගැන සමහර විට ඔබ දැන් සතුටු වෙනවා නේද? "ඒක එහෙම වුණු එකම තමයි හොඳ. දැන් තමයි මට ඒකේ වටිනාකම තේරෙන්නෙ. මං එදා එහෙම වේදනාවක් වින්ද නිසා තමයි අද මට මේ වගේ සතුටක් හෝ හොඳ ජීවන තත්වයක් ලැබී තිබෙන්නේ." මිනිසුන් කොතෙකුත් එවැනි දේ පවසනවා නේද? ඒකෙන් පේන්නේ වේදනාව දැන් වේදනාවක් වුණාට ටික කාලෙකින් එය ජීවිතයට සතුට හා ශක්තිය සපයන වෙස්වලාගත් ආශිර්වාදයක් බවයි.


4. අනෙක් මිනිසුන්ගේ දුර්වලතා ඔබේ ප්‍රශ්නයක් කර ගන්න එපා

කරදර කාලයන්වලත් සාමාන්‍ය කාලයෙදිත් ඔබට නොයෙක් මිනිසුන් හමුවෙනවා. ඒ අතර බොහෝ මිනිසුන් ඉන්නවා ඔබගේ හැකියාවන් ඔබේ යහපත්බව නොදැක හැමවිටම ඔබට පහත් කර සලකන. ඇත්තටම ඔබට කරදර ඇතිවන කාලය තමයි නියම යාළුවන් හඳුනා ගැනීමට තිබෙන හොඳම කාලය. ඔබ වටා සිටින්නේ ජීවිතය ඍණාත්මකව දකින මිනිසුන් නම්, ඔවුන්ගෙන් සදහාටම අයින් වෙන්නට නොහැකි නම්, අඩුම ගානේ කරදර කාලවලදිවත් ඔවුන්ගෙන් ඈත්ව සිටින්න. එවැනි අයගෙන් ඔබට සහනයක් නොව තවත් ප්‍රශ්න බැරෑරුම් වීමක් තමයි වෙන්නේ. ඔබගේ ප්‍රශ්න තේරුම් ගන්න පුළුවන්, ඒවාට හොඳින් ඇහුම්කන් දෙන්න පුළුවන්, ඔබට ශක්තියක් සැහැල්ලුවක් දනවන අයව ළං කර ගන්න.


5. කිසිදු දුකක් නැති තැන සැපක්ද නොමැත

ලෝකයේ නියතව නොවෙනස්ව තිබෙන කිසිම දෙයක් නැත. ඇත්තටම ලෝකයේ නියතව තිබෙන එකම දෙය නම් වෙනස වේ. හැමවිටම ජීවිතය ඔබේ සිතැඟි අනුවම නොපවතී. සමහර කාලවලදී ජීවිතය අපායක් සේ දැනෙන අතර, තවත් කාලවලදී ඔබ සිතන පරිදිම සියලු දේවල් සිදු වේ. ජීවිතයේ ස්වභාවය එබදුයි.


ජීවිතය සැහැල්ලුවෙන් හොඳින් යන කොට අපේ බලාපොරොත්තුද ඉහළ යනවා. උසස් බලාපොරොත්තු තබා ගැනීම ඇත්තටම හොඳයි. එහෙත් බලාපොරොත්තු ඉහළ යන විට, ඒවා සැබෑ කර ගැනීමට නොහැකි වන විට ඔබට දැනෙන දුකද පීඩාවද වැඩි වන්නට පුළුවන්. කෝකටත් ජීවිතයේ දුක්ඛිත කරදරකාරී කාලවලට මුහුණ දීමට සිදු වුවොත් ඊටද සූදානම්ව සිටීම සාර්ථක ජීවිතයකට අවශ්‍ය වේ. ඒ වගේමයි අපි අත්දැකීමෙන්ම දන්නවා නරක කාලය ඉවර වුණාම නැවත අපට හොඳ කාලයක් ලැබෙනවා. ජීවිතයේ සාමාන්‍ය ස්වභාවය එයයි. දුක හා සැප නිරන්තරයෙන්ම පෙරළෙනවා.


එමනිසා ඔබට දැනට ජීවිතේ ලැබී ඇති දේවලට හැමවිටම කෘතඥ වෙන්න. ජීවිතය සිනහවෙන් ගෙවන්න. ජීවිතය කෙටියි. සතුටුදායක මොහොතවල් පවතින්නේ සුළු කාලයක්. එමනිසා ජීවිතය හැකි පමණ සතුටින් සිටින්නට අත්දැකීම් එකතු කරගන්නට උත්සහ කරන්න. අද රාත්‍රිය අඳුරු වුණාට හෙට අනිවාර්යෙන්ම ඉර පායන බව නිතරම මතක් කර ගන්න.
Read More »

Friday, June 26, 2015

මෝහනය / mohanaya (Hypnosis) - 13

2
කෙනෙකුව මෝහනය කර ගැටළුවට සරිලන යෝජනාවලියක් කීමෙන් පසුව බොහෝ විට, ඔහුට පොදුවේ දිය හැකි යෝජනාද දිය හැකි නම් එය තවත් වටිනවා. ජීවත් වන අප කවුරුත් කැමැතියි අප කරන දෙය කුමක් වුවත් එය කම්මැලිකමක් නැතිව සතුටින් උද්‍යෝගයෙන් කරන්න පුළුවන් නම්. ජීවිතයේ සාමාන්‍ය ගැටලු ප්‍රශ්න හමුවේ නොසැලී සිටීමට අපට අවශ්‍යයි. හොඳ නින්දක් ලැබීමට අවශ්‍යයි. මේ ආදී ලෙස එදිනෙදා ජීවිතයට ධනාත්මකව බලපාන හොඳ පුරුදු වැඩි දියුණු කරමින්, ඍණාත්මකව පවතින නරක පුරුදු අවම කරමින් සාර්ථක ජීවිතයක් සඳහා පොදුවේ කාටත් දිය හැකි යෝජනා තිබෙනවා.

මෙවැනි පොදු යෝජනාවල තවත් වැදගත් කමක් තිබෙනවා. හැමවිටම ඔබ කාවහරි මෝහනයට පත් කරන්නේ ඔහුගේ ගැටළුවකට සහනයක් ලබා දීමටම නොවේ. විනෝදෙට මෝහනය වන්නට කැමති අය ඉන්නවා. ඔබ මෝහනය කරන්න දන්න අයකු බව ආරංචි වුණාම තමන්වත් මෝහනය කරන්න කියා බොහෝ හිතවතුන් ඉල්ලා සිටිනවා. මෙන්න මෙවැනි අවස්ථාවලත්, ඔවුන්ව මෝහනයට පත් කර නිකංම ඉන් ඉවත් කරනවාට වඩා මෙවැනි පොදු කාටත් පිළිගත හැකි කවුරුත් කැමැති යෝජනා කිහිපයක් ඔවුන්ට දිය හැකියි. එවිට, ඔවුන් මෝහනයට පත්වීමෙන් යම් ප්‍රයෝජනයක්ද ලැබෙනවා.

එවැනි පොදු යෝජනාවලියක් මා පහත දක්වනවා. මෙම යෝජනා ඇත්තටම කටපාඩම් කිරීම අවශ්‍ය නැහැ. කිහිප සැරයක් මෙය කී විට ඉබේම මතක සිටිනවා. ඒ විතරක් නොවේ, ‍‍ඒ ඒ කෙනා අනුව පොඩි පොඩි වෙනස්කම් සහිතවද මෙම යෝජනා දිය හැකියි. උදාහරණයක් ලෙස, පාඩම් කරන ළමයෙකු නම්, ඔහුට හොඳින් මතක සිටින්න, පාඩම් කරන විට විනෝදයක් සැහැල්ලුවක් දැනෙන්න ආදී යෝජනා කළ හැකියි. කසාද බැඳපු කෙනෙකු නම්, එම ජීවිතයේ දෙදෙනා එකට තීරණ ගැනීම, එකිනෙකා ගැන සොයා බැලීම සතුට දනවන දෙයක් ආදී ලෙස යෝජනා කළ හැකියි. මෙම යෝජනා සඳහාද යෝජනා සකස් කිරීමේදි අනුගමනය කළ යුතු රීති පිළිපදින්න.

“ජීවිතය සැහැල්ලුවෙන් හා සතුටින් ගත කිරීමට ඔබ මෙතැන් සිට උනන්දු වෙනවා. ඔබට දැනෙන සියළුම සතුටුදායක හා අමාරු අත්දැකීම් ඔබ සැහැල්ලුවෙන් භාර ගන්නවා. අමාරු කාලයන් ජීවිතය ගැන වටිනා පාඩම් කියා දෙන වෙස්වලාගත් ආශිර්වාදයක් බව ඔබ මෙතැන් සිට සිතනවා. ඔබේ ජීවිතය ගැන තීරණ ඔබම ගන්නවා. ජීවිතය සාර්ථක කර ගැනීමට අවශ්‍ය දැනුම ඔබ දිනපතා ලබා ගන්නවා. ඔබේ මුදල් නාස්ති කරන, ඔබේ සෞඛ්‍ය දුර්වල කරන දේවලින් ඔබ ඈත් වෙනවා. වෙනත් අය එවැනි නාස්තිකාර දේවලට ඔබව පොළඹවන්න උත්සහ කරන විට, ඔබ තව තවත් ඒවයෙන් ඈත් වෙනවා. ඔබට දිනපතා එකතු කර ගන්නා වටිනා දැනුම එදිනෙදා ජීවිතය සාර්ථක කර ගන්නට යොදා ගන්නවා. ඔබ දන්නවා ජීවිතයේ යම් ප්‍රශ්නයක්... අමාරු කාලයක්... පැමිණි විට ඒ ගැන දුක් වෙවී ඉන්න එක මහා කාලකන්නි අප්‍රියජනක එපාම කරපු දෙයක් බව. ඒ වෙනුවට ජීවිතයේ ප්‍රශ්න හා අමාරු කාලයන් පැමිණි විට, ඒවා ගැන හොඳින් සොයා බලා ඒවා සාර්ථකව විසදීමට ඔබ අධිෂ්ඨානයක් ආශාවක් ඇති කර ගන්නවා. මට කළ නොහැක්කක් නැහැ කියා ඔබ නිතර සිතනවා. ජීවිතයේ සතුට වැඩි වන්නේ වරින් වර එවැනි ප්‍රශ්න හා අමාරු කාලයන්ට සාර්ථකව මුහුණ දුන් විටයි. රත් වූ විට යකඩ වුවත් තලා අවශ්‍ය හැඩයන්ට සකස් කරන්න පුළුවන් වාගේම අමාරු කාලයන්හි ඔබගේ ජීවිතය සාර්ථකත්වය දිශාවට සකස් කර ගන්න පුළුවන්. ඔව් ඔබට එය කරන්න පුළුවන්. ලෝකයේ සාර්ථක මිනිසුන් එහෙම කරලා තිබෙනවා. ඔබටත් එසේ කරන්න පුළුවන්. ඔබේ සාර්ථකත්වය තිබෙන්නේ ඔබ ගන්නා හොඳ තීරණ තුලයි. කුමන තත්වයක් යටතේ වුවත් ජීවිතය ඉතාම සුන්දරයි කියා ඔබ නිතරම සිහි කරනවා. ඔව්... මෙතැන් සිට ඔබේ ජීවිතය සාර්ථකව සියලු අභියෝගයන්ට මුහුණ දී ජය ගන්න ඔබට පුලුවන්.”

ඉහත ආකාරයට සරල යෝජනා ගණනාවක් දිය හැකියි. එලෙස කියාගෙන යන අතරේ එකම යෝජනාව සැරින් සැරේට කිහිප වතාවක්ම වුවත් කියන්නට පුලුවන්. සමහර විට, ඔබට අලුත් යෝජනාවක් සාදා ගැනීමට හෝ මතකෙට එන්නේ නැති වෙන්න පුළුවන්. එවැනි විටකද උපක්‍රමයක් ලෙස (අලුත් යෝජනාවක් සිතට එන තුරු) පරණ යෝජනාවක් කිව හැකියි. ඔබේ හඬ ලස්සනට උස් පහත් කරමින් ‍ඔහුට දැනෙන විදියට කිව හැකි නම් බොහෝ සාර්ථකව එය කළ හැකියි.

කෙනෙකුව මෝහනයෙන් ඉවත් කර ඇස් ඇරපු ගමන් තත්පර 30ක් විනාඩියක් පමණ යන තෙක් ඔහු තවමත් සිටින්නේ තවත් ආකාරයක මෝහන තත්වයකයි. එයද ඔබට ප්‍රයෝජනයට ගත හැකියි. ඔහු ඇස් ඇරපු ගමන්, කියන්න ඔබේ ඇස් දෙක දිහා බලාගෙන ඔබ කියන දේ හොඳින් අහගෙන ඉන්න කියලා. ඔබත් ඔහුගේ ඇස් දෙක දෙස එක එල්ලේ බලා සිටින්න. හැකි පමණ ඇසිපිල්ලන් නොගසා සිටින්නට උත්සහ කරන්න. එසේ ඔහු ඔබ දෙස බලාගෙන සිටින විට සුදුසු යෝජනා තුන හතරක් පමණ ගම්භීරව ඔහුට කියන්න. බොහෝ විට, මෙම යෝජනා ඔබ විනාඩි ගණනක් තුළ කියපු යෝජනාවල සාරාංශයක් හා එම යෝජනා මෙතැන් සිට ඔහු තුළ ක්‍රියාත්මක වන බව හඟවන යෝජනා වේ. උදාහරණයක් ලෙස එවැනි යෝජනාවලියක් මා පහත දක්වනවා.

“හරි... දැන් ඔබ මගේ ඇස් දෙක දිහා විතරක් බලාගෙන මං කියන දේ හොඳින් අහගන්න. ඔබ මෙතැන් සිට අලුත් ජවයක් අලුත් ජීවිතයක් ලැබුණා. ඔබ ඉතා ශක්තිසම්පන්නව සාර්ථකව ජීවිතයට මුහුණ දෙනවා. ඒක තදින් විශ්වාස කරන්න. ඔබට කරන්න බැරි දෙයක් නැහැ. ඔබ ඔබටම දැන් සිතින් කියාගන්න “මට කරන්න බැරි දෙයක් නැහැ” කියලා. දැන් ඒක කරන්න [තත්පර දෙකක් පමණ දෙන්න එය ඔහුට සිතින් කීමට]. ඔබ නිදා සිටින විටත්, ‍තව අයත් එක්ක කතා කරන කොටත්, කන කොට, නාන කොට මේ හැම අවස්ථාවකදීම ඔබට නොදැනුවත්වම ඔබව ශක්තිමත් කරන ඔබව සාර්ථක කරන ශක්තියක් දැන් ඔබ තුළ ක්‍රියාත්මක වෙනවා. එය විශ්වාස කරන්න. ඊට ඔබ සහය වන්න. ඔබට පුළුවන්. ඔබ බොහොම හොඳින් මෝහනය සාර්ථකව නිමා කළා. නියමයි... [ඔහුට සුහදශීලිව සිනහ සී අවශ්‍ය නම් අතට අත දෙන්න. කොහොමද... හොඳයි නේද කියල අසන්න. ඔහු අනිවාර්යෙන්ම ඔව් හොඳයි කියා වචනයෙන් හරි ‍ඔලුව වනා හෝ ප්‍රතිචාර දක්වනවාමයි. ඔබටත් ලබා ගත යුත්තේ එම ධනාත්මක ප්‍රතිචාරයයි. එය ඔහුගේ යටි සිතට දෙන සංඥාවක් තමන් සාර්ථකව මෝහනය ලබා ගත්තා; දැන් තමන්ගේ ගැටළුවට විසදුම ලැබුණා කියා. ඇත්තටම මෙවැනි ට්‍රික්ස් කරන්නට ඕනෑ ඔබට සාර්ථකව මෝහන සැසියක් නිමා කිරීමට නම්. ඒ විතරක් නෙමේ, විශේෂයෙන් මෙම යෝජනා කියන විට අනිවාර්යෙන්ම නාට්‍යානුසාරයෙන් ඔහුගේ “බොක්කටම” දැනෙන ලෙස උස් හඬකින් පවසන්න.]

ඔබට දැන් පුළුවන් කෙනෙකුව මෝහනයට පත් කර, අවශ්‍ය සුදුසු යෝජනා දී (හෝ නොදී) මෝහනයෙන් ඉවත් කරන්නට. මෝහනයේදී ඉතාම කලාතුරකින් හෝ සිදුවිය හැකි අපසර්ජන අවස්ථාවන්ද කළමනාකරණය කරන සැටිත් ඔබ දැන් දන්නවා. ඇත්තටම මෝහනයේදී සිදුවිය හැකි යම් බරපතල තත්වය නම් අපසර්ජනයයි. එනිසා, එයට මුහුණ දීමට ඔබ දැන සිටිය යුතුයි.

ඔබ දැනට දන්නේ එල්මන් ඉන්ඩක්ෂන් එක පමණි. තවත් ඉන්ඩක්ෂන් ක්‍රම දෙක තුනක් හෝ දැන සිටීම වැදගත්. ඒ වගේමයි, ඔබ දැනටත් හොඳ ඩීප්නින් ‍ක්‍රම ගණනාවක් හා මෝහනයෙන් ඉවත් කරන ක්‍රම සියල්ලම දන්නවා.

තවද, මෝහනය ගැන මිථ්‍යා සමග ගැට නොගැසුණු (“විද්‍යාත්මක”) හොඳ දැනුමක් ඔබට තිබෙනවා. ඔබ අන්තර්ජාලය හෝ වෙනත් ජනමාධ්‍ය ඔස්සේ මෝහනය ගැන ඇති දේවල් අධ්‍යනය කළොත් පෙනේවි බොහෝ අය මෝහනය සමග ජ්‍යොතිෂය, “චක්‍ර ශක්ති (කුණ්ඩලීනි)”, රෙයිකි ආදී බොහෝ විද්‍යාවෙන් තොර (මා ඒවා පෞද්ගලිකවම ප්‍රතික්ෂේප කරනවා) දේවල් සමග භාවිතා කරනවා. ඉන්ම පෙනෙනවා මේ අය තුළ විද්‍යාත්මක පසුබිමක් නොමැති “සාස්තරකාරයන්” “දේවාල කපුවන්” මෙන් සිතන හා ක්‍රියාත්මක වන තත්වයක් පවතින බව. එබැවින් එවැනි අය ගැන සැක ඇති කර ගන්න. විද්‍යාත්මක චින්තනයක් ඔස්සේ පිහිටා ක්‍රියා කරන අයට ළං වන්න. මෙවැනි විද්‍යාවෙන් තොර (මිථ්‍යා) ක්ෂේත්‍රයන් සමග මෝහනය සම්බන්ද කරගෙන කටයුතු කිරීමෙන් මෝහනයද මිථ්‍යා දෙයක් බවට ඉබේම හංවඩු ගැහෙනවා. එමනිසා එවැනි “ඔල්මාදකාරයන්ගෙන්” වටිනා මෝහනය බේරා ගැනීමට තිබෙන එකම විදිය නම් ඔවුන්ගෙන් සේවාවන් ලබා නොගැනීමත් ඔවුන්ගේ ව්‍යාජත්වය පුළුවන් තරම් ඔබේ මිතුරුන්‍ට හා අවශ්‍ය තැන්වලදී පෙන්වා දීමත්ය.

මෝහනය හා කිතුනු දහම අතරද යම් ගැටුමක් ප්‍රශ්නයක් ඇත. සමහර ක්‍රිස්තියානි නිකායන් මෝහනයට විරුද්ධයි. ඊට හේතුවද මෝහනය විද්‍යාත්මක දෙයක් ලෙස නොසලකා අද්භූත (සාතන්ට අයත්) කටයුත්තක් ලෙස සැලකීමයි. බයිබලයේ සඳහන් වෙන “හූනියන් කරන්නන් [...] ඔබ අතර නොසිටිය යුතුය” වැනි වාඛ්‍ය ඔවුන් මේ සඳහා උපුටා දක්වනවා. ඒ කියන්නේ මෝහනවේදින් හූනියම්කරන්නන් (necromancer) ලෙස හා මෝහනවේදය හදිහූනියම් ලෙසයි ඔවුන් දකින්නේ. ඇත්තටම මෙය ඉතාම කනගාටුදායක තත්වයක්. උදාහරණයක් ලෙස, මා දන්නා ඇමරිකාවේ සිටින ශ්‍රී ලාංකික කාන්තාවකට ඇගේ ප්‍රශ්න ගණනාවකටම ඉතා සාර්ථක මෝහන ප්‍රතිකාර පවතින නිසා, ලෝකයේ දැනට සිටින හොඳම මෝහනවේදියා යැයි මා විශ්වාස කරන ජෙරල්ඩ් කේන් මහතා වෙතට මා ඇයට යන්නට උපදෙස් දුන් අතර, ඔහුගෙන් “ඇපොයින්ට්මන්ට්” එකක් දාගත්තටත් පසුව ඈ සම්බන්ධව සිටින පල්ලියෙන් ඈට එය නොකරන ලෙස තරයේ අවවාද කර තිබීමෙන් ඈ විශාල දෙගෙඩියාවෙන් පසු වෙනවා.

ඇත්තෙන්ම මෝහනයේදී ශුද්ධාත්මයක් හෝ භූතාත්මයක් හෝ “සාතන්” හෝ සමග ඍජුව හෝ වක්‍රව කටයුතු කරන දෙයක් නොවේ. මා මෙතෙක් කියූ කිසිම මෝහන යෝජනාවක එවැනි ආගමික වචනයක් පවා හමු නොවේ. එය කිසියම් සරල උපදෙස් ටිකකට සවන් දීම පමණි. මෝහනවේදියාට මෝහනලාභියා අකමැති දේවල්ද කළ නොහැකියි. මිනිසුන් තවදුරටත් තවකෙකුගේ අදහස් කොන්දේසි විරහිතව පිළිගෙන වහලුන් ලෙස සිටීම කනගාටුදායකය.

මෝහනය හා බුදු දහම අතරද ගැටළුවක් පෙනේ. ඊට හේතුව දහම තුළ තිබෙන ප්‍රකාශන නොව, අපේ ඔලමොට්ටලයන් හා ඔල්මාදකාරයන්ගේ විවරණයි. මෝහනවේදය (හා මනෝවිද්‍යාව) තුළ ඉගැන්වෙන මනස/සිත හා බුදු දහම තුළ ඉගැන්වෙන සිත පටලවා ගැනීම ඉන් ප්‍රමුඛතම අවස්ථාවයි. පැහැදිලිවම බුදු දහම තුළ සිත ඉගැන්වෙන පරිදි නොවේ විද්‍යාව තුළ සිත ගැන පැහැදිලි කෙරෙන්නේ. එනිසා ඒ දෙක වෙන වෙනම දෙකක් ලෙස අධ්‍යනය කළ යුතු තත්වයකයි පවතින්නේ. විද්‍යාව තුළ මනස යනු කුමක්දැයි පොත ආරම්භයේදී කෙටියෙන් නමුත් පැහැදිලිව විස්තර කර ඇත.

බුදු දහම තුළ සිත යනු භෞතික ශරීරයෙන් පරිභාහිර මොලයට වඩා හදවත ආශ්‍රය කරගෙන පවතින යම් ශක්තියක් වැනි තත්වයක්. සාමාන්‍ය ව්‍යවහාරයේ පවතින ශක්තිය යන සංකල්පයද බුදු දහමේ මෙම සිත සඳහා සැබැවින්ම යොදා ගැනීමේ අපහසුතාවක් තිබේ. “අරමුණු දැනගැනීමම සිත” යැයි බුදු දහම තුළ ඉගැන්වේ. විද්‍යාවේදී මෙන්ම සිතද යම් ක්‍රියාකාරි ස්වභාවයකි. එය ද්‍රව්‍යාත්මක නොවේ. කර්මය, පව් පිං, පුනර්භවය, නිවන ආදී සියලුම වැදගත් සංකල්ප කේන්ද්‍රව පවතින්නේ සිත වටාය. බුදු දහම අනුව සිත ගැන යම් හෝ ප්‍රමාණයක විස්තරයක් කිරීමට වාඛ්‍ය කිහිපයකින් කිරීම ඉතා අපහසුය. බුදු දහම වෛද්‍ය විද්‍යාවක් නොවේ. ඊට සුවිශේෂි ස්ථානයක් පවතී. ඉතිං මෙවැනි එදිනෙදා ලෝකය ගැන සාපේක්ෂ වශයෙන් සලකා බලන විද්‍යා සංකල්ප බුදු දහම හෝ එහි සංකල්ප ඔස්සේ විග්‍රහ කරන්නට යෑමම මෝඩ කමකි. අපට බුදු දහමින් කෝච්චි හදන්නට කියා දෙන්නේ නැත; ඒ වගේමයි විද්‍යාවෙන් නිවන් යන හැටි උගන්වන්නේද නැත.

ඊට අමතරව, මෝහන තත්වය හෙවත් මෝහන නිද්‍රාව භාවනාවක් ලෙස උපකල්පනය කර, සමහරෙක් බුදු දහම තුළ භාවනාව (විශේෂයෙන් සමථ භාවනාව) ගැන ඉගැන්වෙන කාරණා මෝහනය පැහැදිලි කිරීමට යොදා ගන්නවා. එයද කිසිම තේරුමක් නැති දෙයකි. භාවනාව (meditation) යනු බුදු දහම තුළත් ඉන් පිටතින් ඇති දර්ශන මතවාද තුළත් පවතින දෙයකි. නූතන සරල (බටහිර) දැක්ම අනුව නම්, භාවනාවෙන් සිදු වන්නේ සිතේ සන්සුන්බව ඇති කර ගැනීමයි. සිත එලෙස දීර්ඝ කාලීනව සන්සුන්ව තබා ගැනීමෙන් කෝටිසෝල් මට්ටම අඩු වීම ආදී අතුරු ප්‍රයෝජනද පැවතිය හැකියි. ඒ සඳහා විවිධ වර්ගයේ භාවනා වර්ග විවිධ ලස්සන නම් යොදා ගෙන, විවිධ ඉරියව් වලින් කළ හැකි පරිදි නිර්මාණය කර ගෙන තිබෙනවා. ඊට අමතරව, භාවනාවෙන් ධ්‍යාන ආදී විවිධ අද්භූත ඥාන හා හැකියාවන් ඇති කර ගත හැකි යැයි බුදු දහම හා එවැනි ධර්මයන්වල ඉගැන්වේ. භාවනා මගින් එවැනි අද්භූත හැකියාවන් ලබා ගත් මිනිසෙකු ඔබ මෙතෙක් ජීවිතයේ දැක තිබේද? රසවත් කතා නම් එමට ඇත. එහෙත් ඒවා බොහෝ විට කතාම පමණි. (මට මතකයි වසර ගණනාවකට පෙර මෙවැනි සුවිශේෂි බලයක් සහිත හිමි නමක් ගැන ජාතික පුවත්පතක පළ වූ ලිපි පෙලක්. අප එවැනි කතා පහසුවෙන් විශ්වාස නොකරන නිසා, එම ලිපි ලිවූ පුවත්පත් කතුවරයාට කතා කළ විට, ඔහු අපට බැණ වැදෙමින් කියා සිටියේ ලියන විට පාඨකයන් බැඳ ගැනීමට එලෙස ලිවීමට සිදුවන බවත්, ඔහුට පත්තරවලට ලියන ආකාරය ඉගැන්වීමට කොළු ගැටයන්ගෙන් උපදෙසේ නුවමනා බවයි. අප එකල අධ්‍යාපනය ලබමින් සිටින ලාබාළ වියේ සිටි නිසා එසේ ඔහු කියන්නට ඇති.)

මේ හැරෙන්නට බුදු දහම හා මෝහනය අතර කිසිදු පටලැවිල්ලක් ඇති විය යුතු නැත. බුදු දහම හා වෛද්‍ය විද්‍යාව අතර කිසිදු පටලැවිල්ලක් නැතිව පවතින්නාක් සේ බුදු දහම හා මෝහනය අතරද අනවශ්‍ය පෑහීමක් අවශ්‍ය නැත. මෝහනයෙන් ඔබට නිවන් යා නොහැකියි. මෝහනයෙන් ඔබට අභිඥා හෝ වෙනත් ඥාණ ලබා ගත නොහැකියි.

එහෙත්, සමහර මෝහනවේදින් කල්පනා කරනවා භාවනාවත් එක්තරා විදියක මෝහනයක් කියා. ඊට හේතුව දෙකෙන්ම යම් දුරකට සිත සන්සුන් වන නිසා විය හැකියි. එහෙත් මෝහනය කියන්නේ සිත සැහැල්ලු කර ගැනීමම නොවේ; සන්සුන්බව එහි අතුරු ප්‍රතිපලයක් පමණි. මෝහනයේදී ඔබේ යම් යම් චර්යා වෙනස් කිරීමට උපදෙස් ‍දෙනු ලැබේ. එහෙත් භාවනාවකදී එවැන්නක් සිදු නොවේ. ඒ අනුව භාවනාවත් එක්තරා විදියක මෝහනයක් නම්, ඉතා පැහැදිලිවම එම “භාවනා” ස්වරූපයෙන් පවතින මෝහනය කිසි වැදගම්මකට නැති දෙයක් ලෙස සැලකීමට සිදු වෙනවා. මින් උත්සහ කරන්නේ භාවනාව වැඩක් නැති දෙයක් ලෙස කීමට නොව, භාවනාව හා මෝහනය දෙකක් ලෙස සලකන ලෙස පමණි. එවිට මෝහනය හා භාවනාව ගැන වෙන වෙනම අධ්‍යනය කිරීම හා යොදා ගැනීම කළ හැකියි.

මෝහනය හා “මොලේ තරංග” (brainwaves) අතරද සම්බන්ධයක් ගොඩ නැංවීමට සමහරෙක් උත්සහ කරනවා. ආගමික මතවාද හා භාවනාව ‍වැනි සංකල්පවලට වඩා බ්‍රේන්වේව්ස් බොහෝ විට තවමත් සිංහල පාඨක සමාජයට නුහුරු වන්නට පුළුවන්. එමනිසා එය මා කෙටියෙන් විස්තර කරන්නම්. මොලය ක්‍රියාත්මක වන විට, මොලයේ විවිධ රසායනික ක්‍රියාවලියන් සිදු වේ. එම සමස්ථ ක්‍රියාවලිය අදටත් විද්‍යාවට සම්පූර්ණයෙන් පැහැදිලි කළ නොහැකියි. එහෙත් මෙම සමස්ථ ක්‍රියාවලිය, මොලයේ විවිධ ප්‍රදේශවලට ඉලෙක්ට්‍රෝඩ (electrodes) ලෙස හැඳින්වෙන සංවේදක කූරු හෝ තැටි ගණනාවක් සම්බන්ධ කර ඇති EEG (ElectroEncephaloGraph) හෝ එවැනි උපකරණයක් සවි කිරීමෙන් මොලයෙන් පිටවන සංඥාවන් ලෙස සටහන් කර ගනී. එය හරියට හදවත් ක්‍රියාකාරිත්වය සොයා බැලීමට පපුවට සවි කරන ECG නම් උපකරණයෙන්, එම තිරය මත හදවතේ ක්‍රියාකාරිත්වය යම් තරංග ස්වරූපයේ සංඥාවක් බවට පත් කර පෙන්වන්නාක් බදුය.

මෙලෙස ඊඊජී උපකරණයෙන් මොලයෙන් ලබා ගන්නා එම විද්‍යුත් සංඥාවල සංඛ්‍යාතය (frequency) අනුව ඒවා තීටා, ඩෙල්ටා, ඇල්ෆා, බීටා ආදි ලෙස වර්ග කර තියෙනවා. උදාහරණයක් ලෙස ඇල්ෆා ලෙස සැලකෙන්නේ සංඛ්‍යාතය හර්ට්ස් 8 සිට 12 දක්වා පරාසයයි. මෙලෙස අනෙක් ඒවාටද ඊටම සුවිශේෂි වූ සංඛ්‍යාත පරාසයන් ලබා දී තිබෙනවා. ඊඊජී උපකරණයේ මේ වෙලාවේ ප්‍රධාන වශයෙන් සටහන් වෙන්නේ හර්ට්ස් 10ක තරංගයක් නම් ඉන් කියන්නේ ඔබේ මොලය මේ වෙලාවේ ඇල්ෆා අවස්ථාවේ පවතින බවයි. ඒ විතරක් නොවේ, එක් එක් මොලේ අවස්ථාවලට විවිධ විශේෂතා/ලක්ෂණද ආරෝපණය කරගෙන තිබෙනවා. උදාහරණයක් ලෙස, මොලය ඇල්ෆා අවස්ථාවේ තිබේ නම්, ඔබට හොඳ රිලැක්සේෂන් එකක් මනසේ පවතිනවා යැයි උපකල්පනය කෙරෙනවා. තවද, ඉගෙන ගන්නා දේවල් ඇල්ෆා අවස්ථාවේදී හොඳින් මතක සිටිනවා යැයි පවසනවා. එලෙසම අනෙක් මොලේ අවස්ථා සඳහාද ලක්ෂණ හඳුන්වා දී තිබෙනවා.

මෙම මොලේ තරංග දැනට මොලේ තිබෙන්නේ අහවල් තත්වයේ කියා පෙන්වා දීමට පමණක් නොවේ කරන්නේ, එම තරංග (එනම් මොලයේ තත්වය) විවිධ ක්‍රමවලින් වෙනස් කිරීමට හැකියාවක් පවතින බවත් පැවසෙනවා. එයට brainwave entrainment ලෙස පැවසෙනවා. නම ලොකු වුණාට, බැලූ බැල්මට විශාල කටයුත්තක් වගේ පෙනුනාට එම ක්‍රම ඉතාම සරලයි. පැයක් දෙකක් වැනි සුළු කාලයකින් එම ක්‍රම ඉගෙන ගත හැකියි. තත්පර ගණනක් තුළ ඒවා කළ හැකි පරිදි තැනූ පරිගණක වැඩසටහන් පවා අද තිබෙනවා. එමගින් ඔබට පාඩම් කිරීමට අවශ්‍යයි නම්, මෙවැනි ක්‍රමයකින් මොලය ඇල්ෆා අවස්ථාවට පත් කර පාඩම් කළ විට ඒවා හොඳින් මතක සිටිනවා යැයි පවසනවා. (මා සහ මාගේ මිතුරන් මේවා වසර ගණනාවක් සිදු කර අත්හදා බලා ඇත.) මා ඉතා වගකීමෙන් කියනවා මේ කියූ ඒවා සිදු නොවන බව. ඒවා හුදෙක්ම විද්‍යාත්මක වචන හා මෙවලම් උපයෝගී කරගෙන කරනු ලබන ‍මිථ්‍යා වේ. නූතන විද්‍යා දැනුම අනුව ඇල්ෆා, තීටා ආදී තත්වයන් ඒ කියන තරම් සරල නැති අතර, ඒවාට නියමිත ලක්ෂණ ඇත්තටම එලෙස තීරණය කිරීමටද පහසු නැත. මා ඒ ගැන තවත් විස්තර කරන්නට යන්නේ නැත්තේ එය මෝහන විෂයට පරිභාහිර බැවින්. මේ කුඩා විස්තරය ප්‍රමාණවත් මෝහනය හා බ්‍රේන්වේව් ගැන කතා කිරීමට.

සමහරවිට මෝහනයටත් වඩා අන්තර්ජාලය පුරා මෙම බ්‍රේන්වේව් විෂය ප්‍රචලිතව පවතින්නට පුළුවන්. විශාල මුදල් අය කරමින් එම සේවාවන් ලබා දෙන ආයතන පවා තිබෙනවා (මාත් එවැනි කුඩා සේවාවක් පවත්වාගෙන ගිය කාලයක් තිබුණා). අද ‍සමහරෙක් ඉදිරිපත්ව තිබෙනවා ඔවුන් මේ විෂයන් දෙකම මුසු කොට මිනිසුන් රැවටීමට. මේ දෙක එකක් නොවේ; දෙකකි. මින් සත්‍ය වන්නේ මෝහනය පමණි; අනෙක විද්‍යාත්මක යැයි පෙන්වමින් කරනු ලබන මිථ්‍යාවකි.

Hypnosis (mohanaya) ...

මවිසින් ඉංග්‍රිසි බසින් ලියා ඇමසන් හි ප්‍රකාශයට පත් කළ මෝහනය මුල සිට ක්‍රමානුකූලව උගන්වන අත්පොත පහත ලින්ක් එක මත ක්ලික් කර දැන් නිවසටම ගෙන්වා ගත හැකිය.

https://www.amazon.com/dp/1983231568
Read More »

මෝහනය / mohanaya (Hypnosis) - 12

0
සභාවක් ඉදිරියට ගොස් කතාවක් කිරීමට බියෙන් පෙළෙන කෙනෙකුගේ එම බිය නැති කර, ඊට ශක්තියක් ඇති කිරීමට යෝජනාවලියක් (ස්ක්‍රිප්ට් එකක්) ලියන ආකාරය පියවරෙන් පියවර බලමු.

ප්‍රථමයෙන්ම මතක තබා ගන්න සාමාන්‍ය තත්වය යටතේදී ගැටළුවක් නැතිව කතා කළ හැකි, එහෙත් කුමන හෝ මානසික බියක් නිසා සභාවක් ඉදිරියට යෑමට හෝ පිරිසක් ඉදිරියේදී කතා කිරීමට ‍නොහැකි කෙනෙකුටයි මෝහනයෙන් සහනයක් ලබා දිය හැක්කේ. ඒ කියන්නේ සාමාන්‍ය තත්වය යටතේ යම් දක්ෂතාවක් නැතිනම්, මෝහනයෙන් පමණක් එය ඔප නැංවිය නොහැකියි.

එවැනි කෙනෙකු සමග මෙම බිය/ගැටළුව ගැන සාකච්ඡා කරන විට, ‍ඔවුන් එසේ බිය වන්නට හේතු කියනු ඇත. විවිධ අය විවිධ හේතු කියනු ඇත. ‍මේ අනුව, එම හේතු හඳුනාගෙන සිටීම වැදගත් වේ. සමහරවිට හේතුවක් පෙන්වීමට අපොහොසත් වීමටද පුළුවන්. “අනේ මං දන්නෙ නැහැ... එහෙත් ගොඩක් අය ඉන්න කොට මට කතා කරගන්න බැහැ” ආදී ලෙස පවසන අයද බහුලය. හේතු සොයාගත නොහැකි වුවද බොහෝ විට, ඔබගේ සාමාන්‍ය බුද්ධිය යොදා ගෙන හේතු අඩමානෙට තීරණය කිරීමටද පුළුවන්.

හේතු දැන ගත්තත් නැතත්, එවැනි අවස්ථාවකට මුහුණ දෙන විට, ඔවුන්ට දැනෙන දේ ගැන සැලකිල්ල දක්වන්න. සමහරෙකුට අසුනින් නැගිට ගන්නට අපහසුවක් දැනේ; සිටින තැන සිට වේදිකාවට යෑමට අපහසුවක් දැනේ; කකුල පැටලෙන ස්වභාවයක් දැනේ; අත පය වෙව්ලයි; කට වියලි ස්වභාවයක් ගනී; වචන ගලා නොඑයි; කියන වචන පවා පැටලිලි සහගත වෙව්ලන ස්වභාවයක් ගනී; සභාව දෙස බැලීමට බයක් දක්වයි; තමන් සාමාන්‍යයෙන් දන්නා දේ පවා අමතක වී යයි; කතාවට පාඩම් කළ කරුණු ක්ෂණිකව මනසින් “වාෂ්ප වී යයි”; තමන් සිටින ඉරියව්ව ගැන හැඟීමක් නැතිව යයි;... මේ ආදී ලෙස තමන් පෙළනෙ ගැටළුවට අදාලව විවිධ අසහනයන් දැනෙන්ට ගන්නවා. මෙන්න මෙම අපහසුතා හොඳින් සටහන් කර ගන්න.

ඔබ ලියන යෝජනාවලිය මේ සියළු සටහන් කර ගත් අපහසුතා මග හැරීමට සමත් විය යුතුයි. ඉහත ගත් උදාහරණ අවස්ථාවෙන්ම පේනවා කුඩා තනි වාඛ්‍යයකින් කිව හැකි ප්‍රශ්නයකට වුවද පැතිකඩ ගණනාවක් පවතිනවා. ඇත්තටම මෙලෙස පැතිකඩ ගණනාවක් සොයාගත් විට, වැඩිපුර යෝජනා සකස් කර ගැනීමටද ඉන් පහසුවක් ලැබෙනවා. එලෙස අපහසුතා දැනගත් පසු ඉහතදී ඉගෙන ගත් රීතින් සමූහය පුළුවන් තරම් අනුගමනය කරමින් අවශ්‍ය යෝජනා ලිවීමට පටන් ගත යුතුයි. පළමුව දළ යෝජනා කිහිපයක් ලියන්න (රීතින් ගැන එතරම් නොතකා). දෙවනුව ඒවා රීතින්ට අනුකූල කරන්න.

දළ යෝජනාවලිය
ඔබ දක්ෂ ලෙස කතා කරනවා. කාටත් තේරෙන විදියට කතා කරන්න ඔබ දන්නවා. කතා කරන විට ඔබට බියක් දැනෙන්නේ නැහැ. ඔබගේ අත පය වෙව්ලන්නේ නැහැ. ඔබට හොඳට වචන ගලා ගෙන එනවා. ඔබ සභාව දිහා ‍කෙළින් බලනවා. සභාවේ සිටින අයගේ ඇස් දෙස ඍජුවම බලනවා. ඔවුන් සිනහ වුණත් ඔවුන් ඔබට ඔරවගෙන සිටියත් ඉන් කිසි බියක් අසහනයක් ඔබට දැනෙන්නේ නැහැ. ඔබට කතාවට ආරාධනාව ලැබෙන තුරු නොඉවසිල්ලෙන් බලාගෙන සිටිනවා. කතාවට ආරාධනා කළහම කඩිසරව ආසාවෙන් වේදිකාව වෙතට උජාරුවෙන් ගමන් කරනවා. ඔබ දන්නවා ඔබ කතාවට හොඳින් සූදානම්වයි සිටින්නේ කියා. ඇත්තටම ඔබ කතාවට පෙර ලැබෙන කාලය තුළ ඔබට සොයාගත හැකි හොඳම කරුණු කතාව සඳහා සොයා ගන්නවා. අන්තර්ජාලය, පොත්, පත්‍ර කියවා තමන්ට අදාල තොරතුරු සෙවීමට වෙහස මහන්සි වෙනවා. මිතුරන්ගෙන් විස්තර අසා දැන ගන්නවා. විශේෂඥයන්ගෙන් උපදෙස් ගන්නවා. ඔබට තොරතුරු සොයාගත හැකි හැම ක්‍රමයකින්ම අවශ්‍ය පමණ තොරතුරු සොයා ගෙන හොඳ කතාවක් ඔබ සකස් කර ගන්නවා. එම කතාව කඩ පාඩම් කරනවා වෙනුවට ඒවා හොඳින් විමසා බලා තර්ක කර තමන්ගේම දැනුමේ කොටසක් බවට පත් කර ගන්නවා. එතකොටම ඔබ සභාවට ඉදිරිපත් කරන්නේ තමන් නොදන්නා දෙයක් නො‍ව, තමන්ට තේරෙන තමන්ට ඒ ගැන හැඟීමක් තිබෙන දෙයක්. ඉතා දක්ෂ ලෙස අනිත් අයට තේරෙන ලෙස ඔබ කතාව ඉදිරිපත් කරනවා. සභාවේ අය ඔබ දෙස බලා සිටිනවා දැක්කහම ඔබට පුදුම සතුටක් ශක්තියක් සිතට දැනෙනවා. ඔබට වෙලාව යනවා තේරෙන්නෙ නැහැ. ඔබට කිසිදු බියක් නැහැ මොකද ඔබ කතාව හොඳින් සකස් කරලා තියෙන්නේ. වරදින්න කිසි හේතුවක් නැහැ කියා ඔබ දන්නවා. ඔබ දක්ෂ කථිකයෙක්.

ඉහත මා ලීවේ එකවර මාගේ සිතට ගලා ආ යෝජනාවලියකි. එය මා පුහුණු වී ලියපු එකක් නොවේ. ඉහත අපහසුතා ලැයිස්තුව මාගේ මනසේ තබා ගෙන ඒ සඳහා ඔහේ සිතට අදහස් ගලා ආ විට ලියූ වාඛ්‍යය වේ. ඔබද එලෙස කරන්න. ඔබේම දළ යෝජනාවලි සකස් කරන්න විවිධ ප්‍රශ්න ගණනාවක් සඳහාම. බැලූ බැල්මටත් එම යෝජනා ප්‍රශ්නයට අදාළ අපහසුතා සියල්ලම පාහේ ආවරණය කර ඇත. එහෙත් ඒවා මා දැක්වූ රීතින්ට අනුකූල නොවිය හැකියි. දැන් ඔබ එය නිසි පරිදි සකස් කළ යුතුයි. එය කිරීමට එම රීතින් සමූහයම සිහියේ තිබිය යුතුය. ඔව්, ඔබට එම රීතින් සියල්ලම ඔලුවේ තිබෙන්නට ඕනෑ මෙය කිරීමට. (ඇත්තටම, දළ යෝජනාවලිය සකස් කරන කොටම බොහෝ රීතින්ට අනුකූල වන ලෙස එකවරම ලිවිය හැකියි. ඉහත උදාහරණයේදී යෝජනා ලියන විට මා වුවමනාවෙන්ම රීතිවලින් බැහැර වූයේ ඔබට මෙම ක්‍රියාවලිය ඉගෙන ගැනීම පහසු කිරීමටයි.)

මෙහි ඇති පළමු ප්‍රශ්නය නම්, යෝජනාවලිය සියලුම අපහසුතා ආවරණය කළද යෝජනාවලිය එතරම් දීර්ඝ නොවේ. ඒ අනුව එකම යෝජනාව කිහිප සැරයක් විවිධ ආකාරයට කීමට සිදු වේ. අනෙක් කාරණය නම්, යෝජනාවල පිළිවෙලක් නැති එහෙන් මෙහන් ලියා තිබෙන ස්වරූපයක් තිබෙනවා. ඒ අනුව ඒවා නිසි ආකාරයකින් පෙල ගස්වන්නට අවශ්‍යයි. තවද, නිශේධාත්මක වාඛ්‍ය ගණනාවක් තිබෙනවා. ඒවා සියල්ල එම යෝජනාවලින් අපේක්ෂිත ප්‍රතිඵලයම ලබා ගත හැකි නිශේධාත්මක වචන නොමැති වෙනත් වාඛ්‍ය රටාවන්ට පෙරලිය යුතුයි. මෙම වාඛ්‍ය “අමු ගතිය” වැඩියි. ඒ කියන්නේ එම යෝජනාවලින් කිසිම හැඟීමක් මෝහනලාභියාට දැනෙන්නේ නැත. එම යෝජනාවලට ජවයක් ලබා දීමට අවශ්‍යයි. මේ ලෙස ඉහත දළ යෝජනාවලිය ගැන ඔබ තවදුරටත් සිතා බලන්න ඔබ උගත් රීතින් සමග. මෙය අභ්‍යාසයක් විදියට දළ යෝජනා කිහිපයක් සමගම කරන්න. ඉබේම ඔබට රීතීන් මතක සිටිනු ඇත. දැන් බලමු දුර්වලතා ඉවත් කළ පසු ලැබෙන නියම ස්ක්‍රිප්ට් එක.

මවිසින් ඉංග්‍රිසි බසින් ලියා ඇමසන් හි ප්‍රකාශයට පත් කළ මෝහනය මුල සිට ක්‍රමානුකූලව උගන්වන අත්පොත පහත ලින්ක් එක මත ක්ලික් කර දැන් නිවසටම ගෙන්වා ගත හැකිය.

https://www.amazon.com/dp/1983231568

නිවැරදි යෝජනාවලිය

පළමු පෙළ:
ඔබ පිටකරන සෑම හුස්මක් පාසාම ඔබ සිටි මට්ටමට වඩා ගැඹුරට හා සැහැල්ලු බවකට ඔබව පත් වෙනවා.
ඔබ ඉතා දක්ෂ ලෙස... අනිත් අයට තේරෙන විදියට... කතා කරනවා.
පිරිසක් ඉදිරියේ කතා කරන සෑම වාරයක් පාසාම නැවත නැවතත් එලෙස පිරිසක් ඉදිරියේ කතා කිරීමට ඉතා දැඩි ආශාවක් හා උනන්දුවක් ඔබට දැනෙනවා.
සභාවක් ඉදිරියේ කතා කිරීමම ඔබේ ශරීරයත් සිතත් ඉතා සැහැල්ලුවට පත් වෙනවා.
පිරිසක් ඉදිරියේ ඔබට කතා කිරීමට අවස්ථාවක් ලැබෙන සෑම විටම, ඔබ ඉතාම ඕනෑකමින් එය කිරීමට භාර ගන්නවා.
ඔබ දන්නවා සභාවක් ඉදිරියේ යම් කතාවක් කිරීම ලොකු සතුටක් විනෝදයක් ලබා දෙන දෙයක් බව.
ඔබ දක්ෂ ලෙස කතා කරන්න දන්නවා.
අනෙක් අයට තේරෙන විදියට කතා කරන්න ඔබ දන්නවා.
ඔබ ඉදිරියේ සිටින අයගේ මුහුණ දිහා කෙලින් බලා ගෙන ඔබ කතා කරනවා.
අනෙක් අයගේ ඇස් දිහා බලාගෙන කතා කිරීම ඔබට සැහැල්ලුවක් හා අමුතු ශක්තියක් ඇති වෙනවා.
අනෙක් අය ඔබ දෙස බලාගෙන සිටින විට ඔබ බලසම්පන්න බව ඔබට දැනෙනවා.
ඔව් ඔබ බලසම්පන්න දක්ෂ කථිකයෙක්.
දක්ෂ ලෙස කතා කරන්නේ කොහොමදැයි ඔබ ඉතා ඕනෑකමින් නිතරම සොයා බලනවා.
සමාජයේ සිටින වෙනත් දක්ෂ කථිකයන්ව අධ්‍යනය කර ඔවුන්ගෙන් උගත හැකි දේවල් ඔබ සොයා බලනවා.
පොත පත කියවා නිරන්තරයෙන්ම ඔබේ දැනුම ඔබ වැඩි කර ගන්නවා.
පොත පත කියවන්නට දිනෙන් දිනම ඔබේ ආශාව වැඩි වෙනවා.
ඔබ දන්නවා දැනුම ඉතාම අත්‍යවශ්‍ය හා වටිනා දෙයක් බව.
ඔබේ වචන දැනුමද දිනෙන් දින වැඩි කර ගනිමින් ‍දැනට නොදන්නා වචන ආශාවෙන් ඉගෙන ගන්නවා.
ඔබ කතා කරන විට, නිවැරදි හා උචිත වචන ඉතා පහසුවෙන් ඔබට මතක් වෙනවා.
ඔබ කතා කරගෙන යන විට, එම සභාවෙහි ඇති විය හැකි ඕනෑම අවස්ථාවක් ඉතා සාර්ථකවත් ශක්තිසම්පන්න ලෙසත් දක්ෂ ලෙසත් නොබියව හැසිරවීමට ඔබට හැකියාව තිබෙනවා.
අවස්ථාවට ගැලපෙන විදියට පුද්ගලයාට ගැලපෙන විදියට දක්ෂ ලෙස කතා කිරීමට හැකියාවක් ඔබට දැන් තිබෙනවා. එම හැකියාව දිනෙන් දින දියුණු වෙනවා.
තමන් දක්ෂ කථිකයෙක් බව ඔබට නිතරම සිහිපත් වෙනවා.
අනෙක් අයට පුදුම වෙන විදියට ඉතා ලස්සනට ගම්භීර විදියට ඔබ කතා කරනවා.
තමන්ට කතා කිරීමට තිබෙන මාතෘකාව ගැන පොත්, පත්තර, සඟරා ආදිය කියවා කතාවට අවශ්‍ය කරුණු සොයා බැලීමට ඔබ ඉතා උනන්දු‍ වෙනවා.
දක්ෂ කථිකයකු සතු ගුණාංග සොයා බලා ඒවා ඔබේ ජීවිතයට ඉතා ඕනෑකමින් එකතු කර ගන්නට දැන් සිට ඔබ ආශාවෙන් සිටිනවා.
සභාවක් ඉදිරියේ කතා කිරීමම ඔබට ලොකු සතුටක් සැහැල්ලුවක් ඇති කරනවා.
පිරිසක් ඉදිරියේ කතාවක් කිරීමට අවස්ථාවක් ලැබෙන තුරු ඔබ ඉතා ආශාවෙන් මගබලා සිටිනවා.
ඔබ ඉතා ආසයි පිරිසක් ඉදිරියේ කතා කරන්න.
සභාවක් ඉදිරියේ කතා කරන විට, ඔබේ කට හඩ බලවත් බව ඔබට දැනෙනවා. ඔව් ඔබ සභාව ඉදිරියේ කියන පළමු වචනයේ සිටම ඔබේ හඬ සභාව පුරාම බලසම්පන්න උද්‍යෝගිමත් විදියට පවතිනවා.
සභාවේ සිටින ප්‍රේක්ෂකාගාරයේ සිටින සෑම කෙනෙකුගේම ඇස් දිහා බලා කතා කිරීම ඔබට සැහැල්ලුවක් හා ශක්තිසම්බන්න බවක් ඇති කරනවා.
ඔබේ කතාව ඇසීමට පිරිස වැඩිවන තරමට ඔබ කැමැතියි. ඔව්, මිනිසුන් ගොඩාක් දකින විට, ඔබගේ සිතට පුදුම සහනයක් දැනෙනවා.
ඔබට සිතෙන්නේ එම පිරිසට අවශ්‍යම කතාව තමයි ඔබ දැන් සිදු කරන්නේ කියා.
ඔවුන් ඇවිත් තිබෙන්නේ... රැස්ව සිටින්නේ ඔබගේ කතාව අසන්නයි. ඔබ ඔවුන්ගේ ජීවිත වෙනස් කරන ඔවුන්ගේ ජීවිතයට සතුටක් වටිනාකමක් එකතු කරන විදියට ඉතා දක්ෂ ලෙස ඔබේ කතාව ඉදිරිපත් කරන්න ‍දන්නවා.
දක්ෂ චතුර කථිකයකු ලෙස ප්‍රසිද්ධ වෙනවාට ඔබ ඉතා ආසයි.
අනෙක් අය ඔබ දක්ෂ කථිකයකු කියා පවසනවාට ඔබ හරිම ආසයි.
තමන් දක්ෂ ලෙස කතා කරන්න දන්නා අයකු බව ඒ අයට ඔප්පු කර පෙන්වන්න ඔබ නිතරම උත්සහ කරනවා.
ඔබ දක්ෂ චතුර කථිකයෙක්.
ඔබ අනෙක් අයටත් ආදර්ශයට ගත හැකි තරමේ හොඳ දක්ෂ කථිකයකු ලෙස දිනෙන් දිනම වර්ධනය වෙනවා.
ඔබට ලැබෙන සතුටුදායක මෙන්ම දුක්මුසු ප්‍රතිචාරවලින් ඔබ පන්නරයක් අත්දැකීම් හා පාඩම් ඉගෙන ගන්නවා.
ඔබ කරන සෑම කතාවකටම පසු ඒ ගැන ඔබට විමසා බලා එහි තිබෙන ගුණ දොස් සොයා ඉන් වටිනා පාඩම් ඉගෙන ගන්නවා.
දිනෙන් දින එලෙස පාඩම් ඉගෙන ගනිමින්, චතුර කථිකයකු බවට පත්වීමට නොනවතින ආශාවක් උනන්දුවක් ඔබට දැන් තිබෙනවා.
සාර්ථක ප්‍රතිඵල මෙන්ම අසාර්ථක අවස්ථා පවා ජීවිතය සාර්ථක කරන්නට උදව් වෙන බව ඔබ ඉතා හොඳින් විශ්වාස කරනවා.
ඔබ ඉතා දක්ෂ කථිකයකු සතු සියලු ගුණාංග ඉතා ඉක්මනින් හා ඕනකමින් ඉගෙන ගන්නවා.

දෙවැනි පෙළ
දැන් සිතෙන් මවා ගන්න හෝ සිතින් සිතන්න ඔබ ඉන්නේ යම් සභාවක කියා. ඔව්, ඔබ දැන් සිටින්නේ එම සභාවේ කතාවක් කරන්න. ඔබ ඉතා උනන්දුවෙන් හා ආශාවෙන් බලාගෙන සිටිනවා කොහි මොහෝතේද තමන්ගේ කතාව කිරීමට ආරාධනා කරන්නේ කියා. ඔබ කැමැතිම ඇඳුම ඇඳන්, එම ස්ථානයට ගැලපෙන ලෙස ලස්සනට ඔබ පැමිණ සිටිනවා. ඔබට කතා කිරීමට ලබා දී තිබෙන මාතෘකාව ගැන බොහෝ තොරතුරු සොයාගෙන ඒවා සැලසුම් කර සභාව ඉදිරියේ සිදු කරන්නට නියමිත කතාව හොඳින් පුහුණු වී තමයි ඔබ පැමිණ සිටින්නේ. ඔබ ඔබේ ජීවිතයේ සිදු කරන හොඳම ලස්සනම කතාව මෙයයි. ඒ ගැන ඔබට හොඳටම විශ්වාසයි. ඒවගේමයි, ඔබට හොඳටම විශ්වාසයි සභාවේ සිටින අයත් දැනගනීවි ඒගොල්ලන්ගේ ජීවිත කාලයේ අසන හොඳම කතාව තමයි ඔබ තව සුලු මොහොතකින් කරන්නට යන්නේ කියලා. ඔබ දන්නවා ඔබ ඉතා දක්ෂ කථිකයෙක්. සභාවේ සිටින අයත් දන්නවා ඔබ හොඳම සුපිරිම ගණයේ කථිකයෙකු කියලා. ඒකයි මෙච්චර සෙනඟක් පොර කකා ශාලාව පිරෙන්නම අතුරු සිදුරු නැතිව මිනිසුන් රැස් වෙලා සිටින්නේ. විශාල දැවැන්ත ශාලාවක්. හම්... ඔබ දැන් මනසින් දකින්න එම ශාලාව. වටපිට බලන්න. ඒක ඉතා ලස්සනට සරසපු අති දැවැන්ත ශාලාවක්. බලන්න එහි ලස්සන. හොඳට ආලෝකය තිබෙනවා. සියලු දෙනාටම ඔබ කියන සෑම වචනයක් පාසාම හොඳින් ඇසීමට අනර්ඝතම ශබ්ද විකාශන යන්ත්‍ර එහි තිබෙනවා. ඔබව හොඳින් දර්ශනය වෙන්න හැකි වන පරිදි සාදා ඇති විශාල වේදිකාවක් එහි කෙළවර තිබෙනවා. ඔබට කතා කරන්නට තිබෙන්නේ එම වේදිකාව මත සිටයි. ඔබට දැන් ඉතා දැඩි සතුටක් හා සැහැල්ලුවක් දැනෙනවා. ඔව්, ඔබ තමයි අද දවසේ ඔවුන්ගේ තරුව. ඔවුන් සියලු දෙනාම ඔබ දෙස ඕනෑකමින් බලනවා. ඔබව බලන්නත් ඔවුන් පොරකනවා. ඔබට පුදුම ආඩම්බරයක් සැහැල්ලුවක් දැනෙන්නේ. ඔබ ඔවුන් දෙස බලන විට, ඔවුන් ඔබට සිනහසෙනවා. ඔබත් ඔවුන්ට සිනහවෙන් ආචාර කරනවා. ඔබ ඉතා ආසාවෙන් බලා සිටින්නේ මේ පිරිසට කතාව කිරීමටයි. සිතින් බලන්න. එය කොච්චර ලස්සන උද්‍යෝගිමත් සභාවක්ද කියා. ඔන්න දැන් ඔබේ නම කියනවා. ඔබට ආරාධනා කරනවා කතාව සිදු කිරීමට. ඔබේ සතුට කියා ගන්න බැරි තරම් විශාල බව ඔබට දැනෙනවා. ඔබ වීරයකු සේ සභාව මැදින් වේදිකාව දෙසට ගමන් කරනවා. ඔව්... ඔබ ගමන් කරන විට මිනිසුන් නොනවත්වාම අත් පොලොසන් ගසනවා. ඔබව ගෞරවයෙන් පිළිගත්තේ එහෙමයි. ඔබට විශාල පිරිස ඉදිරියේ කතා කරන්නට ලැබීම ගැන ඔබ සතුටට පත් වෙනවා. ඔබ දැන් වේදිකාව මතට පැමිණ අති විශාල ජනකාය දැක්කහම කියා ගන්න බැරි සතුටක් හා සැහැල්ලුවක් හා ශක්තියක් ඔබට දැනෙනවා. සිතින් බලන්න ඒ සභාව දිහා. ඔවුන්ගේ ඇස් දිහා බලන්න. ඔවුන් ඔබ දෙස ආදරයෙන් ගෞරවයෙන් බලා සිටිනවා. ඔබට කොච්චර ආඩම්බරයක් සතුටක් සැහැල්ලුවක් දැනෙනවාද කියා බලන්න. ඔබ දැන් ඔබේ ජීවිතයේ සිදු කරන රසවත්ම වටිනාම කතාව කරනවා. මිනිසුන් දැඩි ඕනකමින් ඒගොල්ලන්ගේ ජීවිත කාලය තුළ අසන ලස්සනම කතාව අසාගෙන සිටිනවා. ඔබේ හඬ මුළු සභාව පුරාම දෝංකාර දෙමින් මුලු සභාවම වශී කර ගනිමින් තේජාන්විතව ගමන් කරනවා. ඔබේ ඇස් ඔවුන්ගේ ඇස් මුණ ගැසෙනවා. ඔබට දැනෙන්නේ සැහැල්ලුවක්. ඔබේ සිතත් ශරීරයත් දෙකම ඉතාම සැහැල්ලුවෙන් හා සනීපයෙන් තිබෙන බව ඔබට හොඳටම දැනෙනවා. ඔබ සොයාගත් කරුණු ඉතා හොඳින් මතක් වෙනවා. සුදුසු වචන ගලාගෙන එනවා. දිය ඇල්ලකින් පහළට සිත වශිවන විදියට ලස්සන දිය පහර ගලාගෙන වැටෙන්නාක් සේ, ඔබේ මුවින් ලස්සනට වචන ගලා ගෙන එනවා. ඔබ ඉතා දක්ෂ කථිකයෙක්. ඔබ කතාව දැන් අවසන් කරන්නට සූදානම්. එහෙත් ප්‍රෙක්ෂකයන්ට ඕනෑ ඔබ තව දුරටත් කතා කරමින් ඉන්න. එතරම්ම ඔබේ කතාව අනර්ඝයි. එහෙත් කතාවට නියමිත කාලය අවසන් වුණාම ඔබට කතාව නතර කරන්න වෙනවානේ. ඔබ ඉතා අලංකාර විදියටත් දක්ෂ විදියටත් කතාව අවසන් කරනවා. සිතින් බලන්න... මිනිසුන් ඔබට ඔල්වරසන් හඬින් සුභ පතනවා. ඔබ ඉතා ලස්සනට කතාව සිදු කළ බවට ඔවුන්ගේ හැසිරීමෙන් පෙනෙනවා. ඔබත් එය දන්නවා. ඔබ දක්ෂ කථිකයෙක් බව නැවත ඔබටම තහවුරු වෙනවා. ඔබ එවැනිම තවත් කථාවක් ලැබෙන තෙක් නොඉවසිල්ලෙන් සිටින්නේ. ඔබ විශාල පිරිසක් ඉදිරියේ කතා කරන්න ආශාවෙන් උනන්දුවෙන් සිටින්නේ.


දැන් නැවත පළමු පෙළ සම්පූර්ණයෙන් කියවන්න. මින්පසු (පසුවට ඉගැන්වෙන විදියට) මෝහනලාභියාට සාමාන්‍ය කාටත් පොදුවේ කියන යෝජනා කිහිපය කියන්න. ඉන්පසු ඔහුව මෝහනයෙන් ඉවත් කරන්න. මෝහනයෙන් ඉවත් කරන විටත්, ඉවත් කළ විගස එතැන් සිට ඉදිරියට තත්පර 30ක පමණ කාලය තුළත් ඔබට ‍යම් යම් වටිනා යෝජනා කිහිපයක් කිව හැකිය (මේ ගැනත් පසුවට ඉගැන්වේ).

ඉහත උදාහරණයේදී පළමු පෙළ හා දෙවැනි පෙළ ලෙස කොටස් දෙකකින් ස්ක්‍රිප්ට් එක සකස් කර ඇත. එය කියවා බලන විට, පළමු පෙළෙහි ඇත්තේ ඍජු යෝජනා සමූහයක් පමණි. දෙවැනි පෙළෙහි ඇත්තේ නිර්මාණාත්මක සිද්ධියකි. එය අත්‍යවශ්‍යම නැත. එහෙත් එලෙස නිර්මාණාත්මක කතාවක්ද ස්ක්‍රිප්ට් තුළ ඇතුළත් කළ හැකි බව පෙන්වීමටයි මා උත්සහ කළේ. යටි සිතට සත්‍ය සිද්ධියක හා සිතින් මවා ගන්නා සිද්ධියක වෙනසක් නැත. එය යටි සිතේ තවත් වැදගත් ස්වභාවයකි. මෙහිදී නිර්මාණාත්මක සිද්ධිය කියන විට, එය ආරම්භයේදී හා වරින් වර ඔහුට කියන්න “සිතින් මවා ගන්න...” කියා.

තවද, පළමු පෙළ මා එක් එක් වැදගත් කාරණාව වෙන වෙනම (‍පොයින්ට්ස් විදියට) එකක් යට එකක් ලෙසයි ලියා ඇත්තේ. ඊට හේතුව කොලය බලාගෙන කියවීමට පහසුවක් ඉන් ඇති වීමයි. එම කාරණා එක් ඡේදයක් ලෙස එක ගොන්නට ලියුවා නම්, අතරමග කියවගෙන යන විට තමන් කියවමින් සිටි තැන සොයා ගැනීමට යම් අපහසුවක් දැනේ. ඔබ ‍මෝහනලාභියාගේ මුහුණ හා ඉරියව් දෙසද බැලිය යුතුයි ස්ක්‍රිප්ට් කියවගෙන යන අතරේ. එවිට, ඔහු දෙස බලා නැවත කොලය දෙස බලන විට, කියවමින් සිටින තැන එකවර සොයා ගැනීමට එකක් යට එකක් යන ආකාරයට ලිවීමෙන් පහසුවක් ඇති වේ. අවශ්‍ය නම්, එක් එක් කාරණය ඉලක්කම් හෝ වෙනත් සලකුණු යොදාද ලිවිය හැකියි.

පුළුවන් තරම්, මෝහනලාභියාට තමන් කොලයක් බලාගෙනයි මේ කියවන්නේ කියා නොදැනෙන්නට එය කළ යුතුය. ඇත්තටම ස්ක්‍රිප්ට් ලිඛිතව තිබීම අවශ්‍යයි. ඔබ නිදහසේ සිටින විට ඒවා කියවා මූලික කරුණු මතකේ තබා ගන්නට උත්සහ කරන්න. මෝහනලාභියාට සුදුසු ස්ක්‍රිප්ට් එක ඔහුව මෝහනය කිරීමට පෙර සාදා (හෝ සොයාගෙන) එය කිහිප සැරයක් කියවන්න. ප්‍රැක්ටිස් කරන්න. මෝහනවේදියාගේ අතේ හෝ ඔහු අසල ‍මෝහනය ගැන පොත් හා කොල තිබීම ගැටලුවක් නොවේ. ඇත්තටම එසේ තිබීම හොඳය. එවිට, මෝහනලාභියාට මෝහනවේදියා හොඳ උගත් කෙනෙකු යැයි හැඟීමක් ඇති වේ. එය මෝහනය සිදු වීමටද පහසුවකි. (මේ නිසානේ බොහෝ උගත් අය පවා ජනමාධ්‍යවල පිළිසඳරවල යෙදෙන විට, බොහෝ පොත් පත් පසුබිමින් පෙනෙන විදියට එය සිදු කරන්නේ.) ඒ පොත්පත් හා ලියකියවිලි අතර ඔබ ඔහු වෙනුවෙන් කියවන්නට යන ස්ක්‍රිප්ට් එකද තබා ගන්න. එය ඔහුට තේරෙන්නේ නැහැනේ. ඉතිං, ඔහු මෝහනයට පත් වූවාට පසු කොහොමත් ඔහුගේ ඇස් වසන නිසා, හෙමින් සීරුවේ එම කොලය බලාගෙන එය කළ හැකියි. හැබැයි එය කියවන විට පොතක් කියවන විදියට කියවන්න එපා. සාමාන්‍යයෙන් මතකෙන් කතා කරන විදියට හඬ සුදුසු පරිදි උස් පහත් කරමින් ජවය අවශ්‍ය තැනට ජවයද, කොඳුරා කිව යුතු යැයි හැ‍ඟෙන තැන්වල එලෙසද ආදී ලෙස සුදුසු ලෙස එය කියවන්න. කිසිම කොලයක් නැතිව බොහෝ කාලයක පෙර සූදානමක් නැතිවද සිතින්ම ස්ක්‍රිප්ට් සාදා කීමටද හැකියාව කාලයත් සමග ඔබට ලැබෙනු ඇත. එසේ වුවත්, ලිඛිත ස්ක්‍රිප්ට් ඔබ විසින් ලියා තබන්න.


Hypnosis (mohanaya) ...
Read More »

Wednesday, June 24, 2015

මෝහනය / mohanaya (Hypnosis) - 11

0

නිවැරදිව යෝජනාවලි (scripts) ලියන ආකාරය

මෝහන ප්‍රතිකාරයකදී ඉතා වැදගත් කොටස සුදුසු යෝජනාවලියක් මෝහනලාභියාට කීමයි. විනෝදයට මෝහනයට පත්වන අයට නම් එය අවශ්‍ය නැත. බොහෝ අය තමන්ගේම ස්ක්‍රිප්ට් ලියන්නට දන්නේ නැත. රැකියාවකට තමන්ගේ අයදුම්පතක් සකස් කිරීමට හෝ සාමාන්‍ය ලියුමක් ලියා ගැනීමටත් විවිධ පුද්ගලයන්ට භාර දෙන පිරිස් සිටින සමාජයක එක අතකින් එය පුදුමයක්ද නොවේ. මිතුරන් වෙනුවෙන් ආදර ලිපිවල සිට ආයතනික රහස්‍ය ලියවිලි දක්වා බොහෝ ලිපි ලේඛන මා එලෙස ලියා ඇති නිසා ඒ ගැන මා හොඳින් අත් දැක තිබෙනවා. බොහෝ විට තිබෙන්නේ ලිවීමට ඇති අනවශ්‍ය බියකි; පුරුද්දක් නැති කමකි; එහෙමත් නැතිනම් කම්මැලිකමකි.


මවිසින් ඉංග්‍රිසි බසින් ලියා ඇමසන් හි ප්‍රකාශයට පත් කළ මෝහනය මුල සිට ක්‍රමානුකූලව උගන්වන අත්පොත පහත ලින්ක් එක මත ක්ලික් කර දැන් නිවසටම ගෙන්වා ගත හැකිය.

https://www.amazon.com/dp/1983231568

මුදලක් ගෙවා හෝ නොමිලේ මෙවැනි ස්ක්‍රිප්ට් ලබා ගත හැකියි. පොත් වශයෙන්ද ලියා ඇත. එහෙත් ඒවා බොහොමයක් ඉතාම දුර්වල හා අකාර්යක්ෂම (ඒ කියන්නේ අවශ්‍ය වැඩේ ‍නිවැරදිව නොකරන) යෝජනාවලි වේ. සමහර විශ්ව විද්‍යාල නාමයන්ගෙන් පිට කළ එවැනි ස්ක්‍රිප්ට් පොත් පවා ඉතාම දුර්වල මට්ටමේ පවතී. ඔබ මා පහත කියන රීතින් ඉගෙන හොඳින් මතක තබාගෙන එවැනි පොත් කියවා බලන්න මා කියන දේහි සත්‍යාසත්‍යතාව සොයා බැලීමට. ඇත්තටම එය සිදු කර බලන්න. එය එක්තරා විදියක අභ්‍යාසයකි. නිර්මාණාත්මක් (creative) හෝ තාක්ෂණික (technical) ලියවිලි සකස් කරන්නට දක්ෂ වූ පලියට ස්ක්‍රිප්ට් ලිවිය නොහැකියි. ඒ සඳහා අනුගමනය කළ යුතු රීති මාලාවක් තිබෙනවා. මොනවාද ඒ රීතින්? එම රීතින් මා දැන් එකින් එක දක්වනවා.

      ·         හැමවිටම සරල වචන භාවිතා කරන්න.
මේ කරුණ මේ වන විට කිහිප වතාවක්ම සඳහන් කෙරුණා. එසේ වූයේ ඇත්තටම එය එච්චරටම වටිනා කරුණක් නිසා. මේ ගැන තරමක් විස්තරාත්මකව දැන් සලකා බලමු.

වචනයක් යනු නිකංම ශබ්දයක් නොවේ. කනට එය නිකංම ශබ්දයක් ලෙස සංවේදනය වුවද එය මනසට ගිය විට විශාල රසායනික ක්‍රියාවලියක් සිදු වේ. මනසට එය සංඥාවකි; සංකල්පයකි. ඒ සංඥාව හා සම්බන්ධව තවත් විශාල සංඥා ගණනාවක් පවතී. ඒ ඒ සංඥා ගණනාව නැවත තවත් අති විශාල සංඥා ගොන්නකට සම්බන්ධ වේ. මේ ආකාරයට එය මකුළු දැලක් සේ විහිදී යනවා. මකුළු දැලේ මධ්‍යය මෙන් ඔබගේ සිතට යන වචනයෙන් හැඟවෙන සංඥාව පවතී. මෙම ක්‍රියාදාමය ක්ෂණයෙන් සිදු වේ. (දේවල් ඉගෙන ගැනීමට හා වෙනත් කටයුතු සඳහා “මයින්ඩ්මැපින්” නම් ක්‍රමවේදය ඇත්තටම මනසේ මෙන්න මෙම ස්වභාවය තමයි ප්‍රයෝජනයට ගන්නේ.) ඔබට නොදන්නා වචනයක් ඇසුණු විට, මේ ක්‍රියාවලිය සිදු නොවේ. එය නිකංම නන්නාදුනන කෙනෙකු සේ අතරමං වූ කෙනෙකු සේ මනසේ පවතී. ඔබට චීන හෝ වෙනත් භාෂාවක යම් වචනයක් ඇසුණු විට දැනුනු දේ සිහිකර ගන්න.

    ·         හැකි පමණ කෙටි වාඛ්‍ය ලියන්න.
වාඛ්‍ය දිගු වන විට, ඒවා ස්වාභාවයෙන්ම පැටලිලි සහගත වේ. බොහෝ තර්ක කරමින් යම් මහන්සියක් යොදා ඒවායේ ‍තේරුම සොයාගත යුතු වේ. එක් භාෂාවකින් තවත් භාෂාවකට පරිවර්ථනය කිරීමේ යම් අත්දැකීමක් ඇති අයට මේ ප්‍රශ්නය ඉතාම හොඳින් දැනෙනවා. සමහර වාඛ්‍ය පටන් ගන්නා කාරණයෙන් නොව අවසන් කරන්නේ. මේ ප්‍රශ්නය අවම වෙනවා වාඛ්‍ය කෙටි වන තරමට. අනෙක් අතට, ‍දිගු වාඛ්‍ය ලිවීමට ‍හොඳ භාෂා දැනුමක්ද අවශ්‍ය වෙනවා (එසේ භාෂා දැනුමක් නැති අය දිගු වාඛ්‍ය ලියන විට තමයි ඇත්තටම ගැටළු පවා ඇති වන්නේ). එමනිසා සාමාන්‍ය භාෂා දැනුමක් තිබෙන අයට පවා ස්ක්‍රිප්ට් ලියන්නට පුළුවන් කෙටි වාඛ්‍ය වැඩිපුර භාවිතා කරනවා නම්.

    ·         වැරදියට තේරුම් ගත නොහැකි ලෙසට වාඛ්‍ය සකස් කරන්න.
සාමාන්‍ය ව්‍යවහාරයේදී අප කලාත්මකබව වැඩි කිරීමට පණ්ඩිතබව පෙන්වීමට විවිධ වාඛ්‍ය රටා භාවිතා කරනවා. කවි ආදිය ලියන අය ලියන්නේම මේ විදියටයි. එහෙත් යටි සිත සමග “පෙම් කෙලින්නට” හදන්න එපා. කියන දෙයක් කෙලින් “තේරෙන භාෂාවෙන්” කියන්න.

    ·         උපමා උපමේයන්, වෙනත් භාෂා අලංකාර යොදන්න එපා.
යටි සිතට ඒවා තේරෙන්නේ නැත. “ඔබේ මුහුණ මලක් වගේ” කියා උපමාවක් කිව්වොත් යටි සිත ඇත්තටම එය තේරුම් ගන්නේ ඔබේ මුහුණ මලක් කියාය. ඇත්තටම මට සිතා ගන්න බැහැ මගේ යටි සිත එසේ මාගේ මුහුණ මලකි කියා විශ්වාස කරාවිද, එසේ කළා නම් ප්‍රතිඵලය කුමක් වේවිද කියා. කුමක් වුවත්, එවැනි යෝජනාවකින් සිදුවන්නේ අනවශ්‍ය දෙයක්ම පමණි. යටි සිත ව්‍යංග තේරුම් වටහ ගන්නේ නැත.

    ·         “එපා”, “නැහැ” (හෝ ඊට සමාන) වචන භාවිතා කරන්න එපා.
ඇත්තටම මෙය අභියෝගයක්. බොහෝ විට මෝහන ප්‍රතිකාරයක් කරන්නේ නරක පුරුද්දක්/ජීවන රටාවක් වෙනස් කරන්නයි. එවිට අහවල් දේ කරන්න එපා එපා එපා කියා බොහෝ විට කියන්නට අවශ්‍ය වෙනවා. එහෙත් මෙම රීතිය නිසා ඒ විදියට නිශේධාත්මක
(negative) වාඛ්‍ය ලිවිය නොහැකි වෙනවා. උදාහරණයක් ලෙස නියපොතු හපන පුරුද්ද නැති කර ගැනීමට අවශ්‍ය කෙනෙකුට “මෙතැන් සිට ඔබ නියපොතු සපන්නේ නැහැ” කියා කීමට අවශ්‍ය වුවත්, මෙහි “නැහැ” යන කොටස අපට භාවිතා කරන්නට අවසර නැහැ. එවිට ඔබට ඇති විකල්පය කුමක්ද? මදක් සිතා බලන්න.

ඔබට ඒ වෙනුවට කිව හැකියි “නියපොතු සැපුවහම ඇඟිල්ල කැත වෙනවා ඔබටම පේනවා”, “ඔබ නියපොතු සපනවා දැක්කහම වෙනත් අයට ඔබ ගැන පිළිකුලක් ඇති වෙනවා හා එය ඔබව බොහෝ අපහසුතාවකට පත් කරනවා”, “නියපොතු සපන පුරුද්ද ඉතා අප්‍රසන්න හැඟීමක් ඔබට ඇති කරනවා” වැනි වාඛ්‍යය.

ඇත්තටම එලෙස නිශේධාත්මක වචන ‍කිහිපය යොදන්නට එපා කියන්නේ ‍හේතුවක් ඇතිවයි. සාමාන්‍යයෙන් ඔබට යම් දෙයක් එපා හෝ නැහැ කියා කී විට ඇතිවන තත්වයක් තිබෙනවා. උදාහරණයක් ලෙස, ඔබ සෙල්ලම් කරන්න ආසයි යැයි සිතන්න. දැන් කවුරු හරි කියනවා “ඔයා සෙල්ලම් කරන්න” කියා. එය ඔබේ සිතේ ප්‍රබෝධයක් ඇති කරාවි. එහෙත් ඔහු “ඔයා සෙල්ලම් කරන්න එපා” යැයි කී විට අසතුටක් සිතේ ඇති කරාවි. සතුට හෝ අසතුට ඇති කළේ “එපා” කියන වචනය නේද? ඔව්. වචනය ඉතා කුඩා වූවාට ඉන් සිතේ ඇති කරන තත්වය විශාලයි. තර්ක කිරීමේ හැකියාව පවතින්නේ උඩු සිතේ නිසා උඩු සිත තමයි එම වචනයට වටිනාකම ලබා දෙන්නේ. එහෙත් ඔබේ යටි සිතට “එපා”, “නැහැ” ආදි වචන වලින් කියන එවැනි තත්වයක් ඇති කිරීමට ඇති හැකියාව අඩුයි. මෝහන නිද්‍රාවේ ගැඹුර වැඩි වන්නට වන්නට එම වචනවල ශක්තිය අඩු වී යනවා. ඉතා ගැඹුරු මෝහන තත්වයකදී එම වචනවල බලපෑම සම්පූර්ණයෙන්ම වුවද ඉවත් වන්නට පුළුවන්. එවිට “ඔබ මෙතැන් සිට සිගරට් බොන්න එපා” කියූ විට එය යටි සිත මතක තබා ගන්නේ “ඔබ මෙතැන් සිට සිගරට් බොන්න” කියා විය හැකියි.

ඇත්තටම, ඉහත සංසිද්ධිය සිදුවීමට ‍මීට පෙර සඳහන් කළ දෙයක් උපකාරී වෙනවා. ඒ කියන්නේ වචන යනු සංඥාය යන අදහස. “සිගරට් බොනවා” යනු යම් යම් තවත් සංඥා රාශියක් (මකුළු දැලක් සේ) එකිනෙකට සම්බන්ධ කරගත් ප්‍රබල සංඥාවක් ලෙසයි මනසේ පවතින්නේ. එයට ව්‍යාකරණ රීතින් වචනය හරියට ශබ්ද කළාද නැද්ද යන දේවල් වැදගත් නැහැ. එවිට “සිගරට් බොන්න එපා” කියා කිව්වත් “එපා” යන්න යටි සිතට දැන් නොදැනෙන නිසා තමයි “සිගරට් බොන්න” වැනි සංඥාව යටි සිතට ඉබේම ඇති වන්නේ.

ඔබ සාමාන්‍ය ජීවිතයෙත් යටි සිතේ මෙම සංසිද්ධියට නිතරම මුහුණ දෙනවා. උදාහරණයක් ලෙස, ඔබ පෙම්වතා (හෝ පෙම්වතිය) සමග දුරකතනයෙන් කතා කරමින් සිටින විට පෙම්වතාගේ පැත්තෙන් නිකං හෝ ගැහැණු කට හඬක් ඇ‍සුණේ නම්, එය සමහරවිට ප්‍රශ්නයක් කර ගනීවි. ඔබට සිතෙන්නේම ඔහු තවත් යුවතියක් සමග සිටිනවා ලෙස විය හැකියි. ඇයි ඔබට සිතෙන්නේ නැත්තේ ඇය අහල පහල කෙනෙකු හෝ නෑදෑ කෙනෙකු කියා. ඇත්තටම සැක නොකර එසේ සිතන අයත් සිටින්නට පුළුවන්. ඔබේ සිතේ සංඥා ගබඩා වී ඇති ආකාරය අනුව ඒ දේ තීරණය වෙනවා. මෙලෙස අසම්පූර්ණ තත්වයන් (සංඥා) පවා සම්පූර්ණ කර ගන්නට මනස සමත්. එමනිසා, නිශේධාත්මක කොටස් ඉවත් කළ පසු ඇතිවන අසම්පූර්ණ වාඛ්‍ය සම්පූර්ණ කර ගන්නට මනසට පුළුවන්.

එහෙත් මෙහි තවත් පැතිකඩක් තිබෙනවා. මෝහන ප්‍රතිකාරය තුළ මෝහනවේදියා හා මෝහනලාභියා අතර සංවාදද පවතිනවා. මෝහනවේදියා ස්ක්‍රිප්ට් එකක් කියාගෙන යන එකට අමතරව එලෙස සංවාද කිරීමට අවශ්‍ය අවස්ථා තිබෙන්නට පුළුවන්. උදාහරණයක් ලෙස “ඇඟට වැහුණු යක්ෂයන් ප්‍රේතයන් පලවා හැරීම” එවැනි අවස්ථාවක්. එවැනි සංවාද බොහෝ විට ඉතා ගැඹුරු මෝහන මට්ටමක් තුළ නොවේ පවතින්නේ. එලෙස සංවාදයේ යෙදෙන විට නම්, සාමාන්‍ය පරිදි නිශේධාත්මක වචන භාවිතා කරන්නට පුළුවන්. “‍මේ මොහොතේ සිට මේ ශරීර කූඩුවට ඔබට ඇතුළු වෙන්නට බැහැ” (මෙය යක්ෂයාට කියන දෙයකි. එනම්, ආතුරයාට කියන දෙයක්.) වැනි වාඛ්‍ය කිව හැකියි. එහෙත් ස්ක්‍රිප්ට් ලියන විට පුළුවන් තරම් නිශේධාත්මක වචන නොයෙදීම වඩා සුදුසුය.

    ·         මෝහනලාභියා දකින/දැනෙන ආකාරයට වාඛ්‍ය ලියන්න.
මෙය මා උදාහරණයක් ආශ්‍රයෙන් පෙන්වා දෙන්නම්. ඇත්තටම මෙම උදාහරණය මා මීට පෙර කරුණ තුළත් ඇතුළත්ව තිබෙනවා. “ඔබ නියපොතු සපනවා දැක්කහම වෙනත් අයට ඔබ ගැන පිළිකුලක් ඇති වෙනවා” යන වාඛ්‍ය ගන්න. මෙය බැලූ බැල්මට හොඳ යෝජනාවක්. එහෙත් මෙහිදී පිළිකුළ ඇතිවන්නේ අනිත් අයටයි. ඊට අමතරව එලෙස වෙනත් අයට පිළිකුළ ඇතිවීම මෝහනලාභියාට ගැටළුවක් අපහසුවක් ඇති වන බවක් ඉන් හඟවන්නේද නැහැ. යටි සිත, උඩු සිත මෙන් තර්ක කර කර “හා අනිත් අයට මං නියපොතු සපන එක පිළිකුළක් එය මගේ තත්වයට හොඳ නැහැ... එමනිසා මා එය නතර කරන්න ඕන” ලෙස සංඥාවක් ඇති කර ගන්නේ නැහැ. එහෙත් එම වාඛ්‍ය “ඔබ නියපොතු සපනවා දැක්කහම වෙනත් අයට ඔබ ගැන පිළිකුළක් ඇති කරනවා; එනිසා ඔබට ලොකු අපහසුවක් ලැජ්ජාවක් ඇති කරනවා” වැනි වාඛ්‍යයක් කී විට එහි බලපෑම තමන්ට දැනෙන දෙයක් බවට පත් කර ඇත.

    ·         කොම්පවුන්ඩිං උපක්‍රමය භාවිතා කරන්න.
compounding යනු මෝහන තත්වයක් තුළ යටි සිතේ පවතින ලක්ෂණයකි. එනම්, යටි සිතට එකින් එක යෝජනා ගොන්නක් (විනාඩි ගණනක් පුරාවට) දිය යුතුය (හෝ හැකිය). එහිදී පළමු යෝජනාව ලබා දී දෙවැනි යෝජනාව ලබා දුන් විට, ඉන් පළමු යෝජනාවේ බලය/සැර වැඩි වේ. තෙවැනි යෝජනාව ලබා දුන් විට, ඊට පෙර ලබා දුන් දෙවැනි යෝජනාවේ බලයද, ඊටත් පෙර ලබා දුන් පළමු යෝජනාවේ බලයද නැවත වැඩි වේ. ඒ කියන්නේ පසුව දෙන සෑම යෝජනාවක්ම හේතු කොට ගෙන ඊට පෙර යෝජනාවල බලයන් වැඩි වේ. මෙය එක්තරා විදියට “වැල් පොලී” ක්‍රමයට කියාත්මක වන තත්වයක්. (ඔව්, බොහෝවිට ඔබ දන්නවා ඇති වැල්පොලියට ඉංග්‍රිසියෙන් කියන්නේ compound interest කියා බව.)

බොහෝ මෝහනවේදීන් පවසනවා යෝජනා කොම්පවුන්ඩ් වීමේදී තිබූ මට්ටමට වඩා දෙගුණයක් සැර වැඩිවන බව. ඒ කියන්නේ පළමු යෝජනාව කියා දෙවැනි යෝජනාව ඉදිරිපත් කළ විට, පළමු යෝජනාව තිබුණු බලයට වඩා දෙගුණයක බලයක්/සැරක් අත්කරගන්නවා. තෙවැනි යෝජනාවක කළ විට, දෙවැනි යෝජනාව දැන් දෙගුණයක සැරක්ද පළමු යෝජනාව හතර ගුණයක් සැරක්ද (ඒ කියන්නේ එය තිබූ මට්ටමෙන් දෙගුණයක්. තෙවැනි යෝජනාව දෙන විට, පළමු යෝජනාව තිබුණේ දෙගුණයක බලයකිනි.) වෙනවා. හතරවැනි යෝජනාව ‍දුන් පසු පළමු යෝජනාව නැවත දෙගුණ වී අටගුණයක් සැර වැඩි‍ වෙනවා. මෙලෙස එකලොස් වැනි යෝජනාවට පසුව පළමු යෝජනාව දහස් ගුණයක බලයක්/සැරක් හිමි කර ගන්නවා.

ඇත්තටම, මා නම් එම මෝහනවේදින්ට එකඟවන්නේ නැත. අනිවාර්යෙන්ම සෑම යෝජනාවකටම පසුව සැර වැඩි වන එක සත්‍යයක්. එහෙත් එය දෙගුණයක් තරම් විශාල මට්ටමකින් සිදු විය නොහැකි බවයි මාගේ හැඟීම. හරියටම කොච්චරක්ද කියා කිසිවෙකුට කිව නොහැකිය. එය මෝහනලාභියා හා ඔහු සිටින මෝහන මට්ටම අනුව වෙනස් විය හැකියි. දළ වශයෙන් එය සියයට එකේ සිට දහය දක්වා ප්‍රමාණයක සැර වැඩි වීමක් ලෙස මා සිතනවා. එයද සුළු පටු නැහැ. විනාඩි ගණනක් තුළ අප යෝජනා සිය ගාණක් ඉදිරිපත් කරනවා. එවිට මෙම කුඩා ප්‍රමාණයෙන් සැර වැඩි වුවත්, එය අවසානයේ වැල්පොලී ක්‍රමයට ක්‍රියාත්මක වීම ‍හේතුවෙන් ඉතා විශාල බලය වැඩි වීමකට ලක් වෙනවා. ගණිතයේ මෙවැනි වැඩි වීම් “ඝාතීයව”
(exponentially) සිදුවෙනවා කියා පවසනවා.

අප මෙම මනසේ හැකියාව අපේ වාසියට හරවා ගත යුතුමයි. මෝහන ප්‍රතිකාරය කිරීම සාමාන්‍යයෙන් වරකට එක් වෙනස්කමක් සඳහා පමණයි සිදු කරන්නේ. ප්‍රශ්න දෙක තුනකට එකම සැසිය තුළ සිදු කිරීම නුසුදුසුයි. උදාහරණයක් ලෙස, සිගරට් බොන එක නතර කිරීම, කරුවලට තිබෙන බිය ඉවත් කිරීමට යන දෙක සඳහාම එකම මෝහන සැසිය තුළ සිදු නොකළ යුතුයි. ඒ සඳහා සැසි වෙන වෙනම පවත්වන්න. මෙලෙස එක් ප්‍රශ්නයක් පමණක් සලකා බලන නිසා, ඔබට පුළුවන් එම ප්‍රශ්නය පමණක් අරමුණු කරගෙන එක් ප්‍රබල ප්‍රධාන කුඩා යෝජනාවක් නිර්මාණය කරන්නට. උදාහරණයක් ලෙස, සිගරට් බොන එක නතර කිරීම සඳහා නම්, “මෙතැන් සිට ඔබ දුම්බීම අප්‍රිය කරනවා; දැන් සිටම දුම් බීම නතර කරනවා” වැනි වාඛ්‍යයක් සෑදීමට. මෙන්න මෙම වාඛ්‍යය ස්ක්‍රිප්ට් එකේ පළමු වාඛ්‍යය ලෙස කියන්න. අනෙක් සියළුම වාඛ්‍යය නිසා මේ ප්‍රධාන වාඛ්‍යය ප්‍රබල වෙනවා. එලෙස එතැන් සිට තිබෙන අනෙත් වාඛ්‍යද ඒවායේ වැදගත් බව සලකා පෙළගස්වන්න.

ඔබට මෙලෙසත් කළ හැකියි. ඇත්තටම මෙය වඩා උචිත විය හැකියි. පළමු යෝජනාව ලෙස “ඔබ පිට කරන සෑම හුස්මක් පාසාම ඔබ සිටි මට්ටමට වඩා සැහැල්ලු ගැඹුරු මට්ටමකට පත් වෙනවා” යන වාඛ්‍යද, දෙවැනි වාඛ්‍යය ලෙස ඉහත ඡේදයේ කියූ ලෙස ඒ ඒ අවස්ථාවට උචිත ප්‍රධාන වාඛ්‍යය කියන්න. මෙවිට මෝහනලාභියා ක්‍රමයෙන් ගැඹුරු මෝහනයටද පත් වෙනවා ඔබ ස්ක්‍රිප්ට් එක කියාගෙන යන විට. එවිට ඔබ කියන යෝජනා වඩා වඩාත් ප්‍රතිඵලදායක වෙනවා.

   ·         විවිධ වචන හා වාඛ්‍ය රටා හැකි පමණ යොදන්න.
ඉහතදී පැවසුවා එක සැසියකදී එක ප්‍රශ්නයක් පමණක් සලකන්න කියා. ඒ කියන්නේ එක සැසියක කියන්නේ එක ස්ක්‍රිප්ට් එකකි. උදාහරණයක් ලෙස, මත්වතුර බොන එක නතර කිරීමට කරන මෝහන සැසියකදී, ඔබ දෙන යෝජනා ඊට අදාල ඒවා විය යුතුයි. සමහරවිට එවැනි යෝජනා දහයක් දොළහක් පමණ කුඩා ප්‍රමාණයක් පමණක් ඔබට ලිවීමට හැකි වේවි. එච්චර කුඩා වාඛ්‍ය ප්‍රමාණයක් කීමට ඔබට වැඩිම වුණොත් විනාඩි දෙකක් ගත වේවි. එවිට එම මෝහන යෝජනාවලිය එතරම් ඵලදායි නොවනු ඇත. මෙය ගැටළුවකි. අනෙක් අතට, කොම්පවුන්ඩිං කිරීමට යෝජනා සිය ගණනක් තිබීමටද අත්‍යවශ්‍ය වේ.

ඉහත ගැටළු දෙකමට හොඳ යෝජනාවක් ඇත. එනම්, එකම යෝජනාව කිහිප සැරයක් කීමයි. උදාහරණයක් ලෙස, විවිධ යෝජනා දහයක් පමණක් ඇති නම්, එකම යෝජනාව දහ සැරයක් ගානේ කියන විට සම්පූර්ණ යෝජනා ප්‍රමාණය 100ක් පමණ වේ.

එහෙත් එකම වාඛ්‍යය කිහිප සැරයක් කියන විට, එය කියන ඔබටද අසන මෝහනලාභියාටද නීරස වේ. එය වැලැක්වීමට එකම වාඛ්‍ය වෙනස් වෙනස් වචන යෙදීමෙන් හා වෙනස් වාඛ්‍ය රටාවන්ට ලිවීමෙන් කළ හැකියි. ඔබේ හඬ සුදුසු පරිදි වෙනස් කරමින් ඒවා කිව හැකියි. මෙලෙස විවිධත්වයක් ලබා දෙන්න.

   ·         හැඟීම්බරව ලියන්න.
යටි සිත හැඟීම්වලට සංවේදී ඒවා ගබඩා කර ගන්නා මනසයි. එනිසා හැඟීම් දනවන ආකාරයට යෝජනා කිහිපයක් හෝ සකස් කරන්න. ලියන වචන පමණක් නොව, කියන විදියෙනුත් හැඟීම් ඇති කළ හැකි බව මතක තබා ගන්න. උදාහරණයක් ලෙස මත්පැන් නතර කිරීමට කියන යෝජනාවලියක සමහර යෝජනා හදන්නට පුළුවන් මත්පැන් ගඳ ගහන අප්‍රිය සහගත දෙයක් ලෙස. එය අසූචි ගොඩක් සේ පිළිකුල් කිරීමට යෝජනා කළ හැකියි. ඒවා කියන විටත් අප්‍රියජනක දෙයක් කියන ආකාරයට කියන්න. එය මෝහනලාභියාට දැනෙනවා. ඒ වගේමයි සභාවක් ඉදිරියට යෑමට බියක් ඇති අය සඳහා ලියන ස්ක්‍රිප්ට් එකක වීරෝධාර බව වැඩි වන ආකාරයට වාඛ්‍ය ලියන්න. ඒවා කියන විටත්, එම හැඟීම් උත්දීපනය වෙන පරිදි කියන්න (අර සමහර චිත්‍රපටි හා නාට්‍යවල නළුවන් අපේ ඇ‍ඟේ රෝම කෙලින් වෙන විදියට කතා කරන්නාක් මෙන්).

   ·         හොඳ හා නරක දෙකම ලියන්න.
බොහෝ විට, යම් ජීවන රටාවේ වෙනසක් ඇති කිරීමට සාදන ස්ක්‍රිප්ට් එකක දෙවර්ගයක යෝජනා අවශ්‍ය වේ. එකක් නම්, එම දැනට පවතින වෙනස් කළ යුතු දේ තුළ පවතින නරක කිව යුතුය. ඊළඟට ඒ වෙනුවට ඇති වන අළුත් ජීවන රටාවේ ‍හොඳ කිව යුතුය. මෙවැනි දෙවර්ගයේම යෝජනා මිශ්‍රව ස්ක්‍රිප්ට් එක සාදන්න.

   ·         සම්පූර්ණ ක්‍රියාවලියම (පැතිකඩ සියල්ල) සැලකිල්ලට ගන්න.
‍හොඳ ස්ක්‍රිප්ට් එකක මෙම ලක්ෂණය තිබිය යුතුමයි. බොහෝ වෙනස්කම් හුදු තනි එකක් නොවේ. උදාහරණයක් ලෙස, දුම්බීම නතර කිරීම සඳහා වැදගත් පැතිකඩ රාශියක් ඇත. ඉන් ඇතිවන මුදල් වැය වීම, ලෙඩ රෝග ඇති වීම, අවලක්ෂණ වීම, තමන්ගේ දරුවන් හෝ ‍අහල පහල සිටින අයව රෝගී කිරීම, දුසරිතින් යුතු මිතුරන් (ඇත්තටම උන් මිතුරු‍ වෙසින් සිටින පසමිතුරන්ය) නිසා දුම්බීම ප්‍රවර්ධනය වීම හා ඉන් වැළකී සිටීමට නොහැකි තත්වයක් ඇති වීම, පාටියකදී හෝ වෙනත් තැනකදී නොමිලේ සිගරට් එකක් දුන් විට බොන්නට සිතීම ආදී විවිධ පැතිකඩ ස්ක්‍රිප්ට් එක විසින් ආවරණය කළ යුතුය. තවත් උදාහරණයක් ගමු. සභාවක් ඉදිරියේ කතා කිරීමට ඇති බිය ඉවත් කිරීමට සාදන යෝජනාවලියක් ගමු. එහිදී නිකංම කතා කිරීමට උනන්දු කරවීම විතරක් ප්‍රමාණවත් නැහැ. කතාවට අදාල තොරතුරු අනලස්ව සොයාගෙන ඒවා සංවිධානාත්මකව සකස් කරගන්නට, කතා කරන විට සභාවේ අයගේ ඇස් දිහා ඍජුව බලන්නට හැකිවීම, තමන්ගේ නම කතා කරන විට හා අත්පුඩි ගසන විට ඇතිවිය හැකි තිගැස්ම නතර කිරීමට හා ඒ වෙනුවට ඊට ආශාවක් ඇති කිරීමට, තමන්ට සිදුවිය හැකි කුඩා කුඩා අතපසුවීම් නිසා තමාගේ ධෛර්ය අඩපණ වීම වැලැක්වීම ආදී නොයෙකුත් පැතිකඩ එහි ඇත.

මෙලෙස, අදාල ප්‍රශ්නයට සම්බන්ද විවිධ පැතිකඩ සියල්ලම හෝ බොහෝ ගණනක් ආවරණය නොකළොත් ඉන්ද මෝහනය අසාර්ථක ව්‍යායාමයක් පමණක් වේවි.



    අනෙක් අතට, සෑම දෙයක්ම මෝහනය කළ පමණින් සාර්ථක නොවේ. උදාහරණයක් ලෙස, ජීවිතය පුරාම සාමාන්‍ය පරිසරය තුළ වුවත් රසවත්ව බුද්ධිමත්ව කතා කිරීමට නොදන්නා කෙනෙකු මෝහනයට පත් කර “ක්ෂණික නූඩ්ල්ස්” වගේ දක්ෂ කථිකයකු කළ නොහැකිය. ඇත්තට කළ නොහැක්කක් නොමැත. ජීවිතය කාලය පුරාම තමන් අදක්ෂ කථිකයකු නම්, පළමුව දක්ෂ කථිකයකු වීමට අවශ්‍ය කුසලතාව වැඩි දියුණු කරගත යුතුයි. අනෙක් දක්ෂ අය කතා කරන විදිය ‍විමසා බලන්න. පොත පත කියවන්න. පුරුදු වෙන්න. ඒ සමගම අවශ්‍ය නම්, මෝහනය වන්න. මෝහනය යනු කෝකටත් තෛලය නොවේ. ඊට කළ හැකි හා නොකළ හැකි දේ තිබේ.

    ඉහත පෙන්වා දුන් රීතින් අනුගමනය කර ඔබට ලෝකයේ ඉතා අනර්ඝතම ස්ක්‍රිප්ට් ලිවිය හැකියි. මා මුලිනුත් පැවසූ ආකාරයට බොහෝ අය ස්ක්‍රිප්ට් ලියන්නේ එක්කෝ මුදල් සෙවීමටයි; නැතිනම් කිසි හැඟීමක් නොමැතිවයි. අනුන්ගේ ස්ක්‍රිප්ට් නොව, තමන්ගේම ඒවා ලියන්නට පුරුදු වෙන්න. ඉහත කරුණු අඩංගු කර ස්ක්‍රිප්ට් එකක් ප්‍රායෝගිව ලියන ආකාරය මා උදාහරණයක් ආශ්‍රයෙන් පෙන්වා දෙන්නම්.

  
    Hypnosis (mohanaya) ...

Read More »

InnoCentive > Challenges & Rewards